Publiká riba 23 Aprel 2024
Ayera djaluna, 22 di aprel 2024, minister di Hustisia mr. Shalten Hato, huntu ku su kabinèt, huntu ku Promé Minister, Gilmar Pisas i miembronan di Kuerpo Polisial Kòrsou a sinta ku asosashon di seguronan di Kòrsou i Boneiru, CBIA pa un reunion di informashon i interkambio di riba diferente tópiko relashoná ku vehíkulonan ku ta kore na Kòrsou sin seguro, ladronisia di vehíkulonan, pero tambe kampaña di informashon i konsientisashon kon ta atendé ku e problemátika di ladronisia i froude di piesanan i vehíkulonan.
Di parti di CBIA, sr. Jair Lopez Penha a indiká ku komo asosashon di seguronan, nan a traha riba diferente strategia i plan pa atendé ku e kantidat di vehíkulonan sin seguro ku ta kore na Kòrsou. Hopi bes nan ta keda konfrontá ku nan klientenan ta enbolbí den un aksidente, den kual e kontra partido no ta dispone di niun seguro. Esaki nan a kuminsá atendé den forma di un “database” den kual nan ta purba yega na dato pa sinkronisá informashon importante entre keuringslokaal i tambe Servisio di Impuesto. CBIA kier e sosten di parti di Gobièrnu di Kòrsou pa duna un man pa kana yega na un sistema, den kual hasta KPC no mester ta visibel na tur momentu riba kaya pa repartishon di but, pero ku hasta e sistema aki lo manda but nan atministrativo via pòst òf koreo elektróniko pa e persona, despues di a kometé un infrakshon.
Di parti di Gobièrnu di Kòrsou, Promé Minister Gilmar Pisas a indiká ku Gobièrnu tin e atenshon nesesario pa e tópiko aki. Gobièrnu a instituí un grupo di trabou riba nivel di ámtenar i tambe ministerial, pa atendé ku diferente tópiko i kambionan relashoná ku e tópiko di vehíkulonan sin seguro aki. Minister di Hustisia, mr. Shalten Hato a enfatisá ku di parti di Hustisia, nan ta den un grupo di trabou huntu ku VVRP, na unda ta kanalisá e trayekto pa yega na sierto kambionan den lei i tambe den e “wegenverordering” aktual. Por ehèmpel, e intenshon ta pa yega na un trayekto pa por but atrabes di camera nan na e hendenan ku kometé infrakshon den lei. Mas aleu Minister Hato a indiká ku komo parti di maneho, Kuerpo Polisial Kòrsou dentro di korto tempu lo bai risibí un tereno serka Ministerio di Tráfiko, Transporte i Planifikashon Urbano, pa re-inisiá e trayekto den kual na momentu ku kontrolá bo vehíkulo, i bo dokumentonan no ta na òrdu, ku lo kita esaki for di e outomobilista i hiba esaki na “Kura”. E sitio i tambe trabounan den kuadro di esaki, lo inisiá pronto i denter di korto, lo bai kompartí mas detayes ku komunidat di e maneho nobo tambe relashoná ku esaki.
Mas aleu, Minister Hato a indiká ku komo asosashon di seguronan CBIA, lo ta importante pa nan tambe duna nan granito den kuadro di konsientisashon di komunidat dor di mustra e importansia di un seguro pa bo vehíkulo. Den kuadro di esaki, Minister Hato a proponé na CBIA pa djòin ku Kuerpo Polisial Kòrsou i tene un kampaña di konsientisashon relashoná ku ladronisia di outo, pero tambe duna mas klaridat relashoná ku e importansia pa bo vehíkulo ta segura, na momentu ku bo ta enbolbí den un aksidente. E reunion a kana den un bon esfera, i tantu Minister Presidènt Pisas i Minister di Hustisia Hato, a indiká na e grupo di lo kier risibí den un próksimo reunion, lokualnan a ser lográ i tambe informashon adishonal di e trayekto ku a duna CBIA aworakí komo rekomendashon.
