Notisia

Huntu pa yega na un solushon pa ku violensia bou di hóbennan na skolnan i riba kaminda públiko

WILLEMSTAD – Ministerio di Enseñansa, Siensia, Kultura & Deporte (ESKD), a yama un reunion huntu ku Ministerio di Hustisia. Minister nan van Heydoorn i Hato, huntu ku nan respektivo timnan di maneho a tene reunion ku tur e Direktivanan di Skol. E tema sentral den e reunion ta e violensia/bringamentu den e área di skol i riba kaminda públiko.

Minister Hato a splika di e diferente trayektonan ku tin den kuadro di prevenshon manera: “Sendé”, kampaña di konsientisashon pa no bringa, ni tenta i tambe a elaborá riba e plan kaminda e bario kompletu den e área di e skolnan ta haña atenshon. Den e plan aki skolnan ta traha ku e asina yama “Buurt Regisseur” (regisor di bario) ku ta miembronan di kuerpo polisial enkargá ku barionan.

Minister Sithree van Heydoorn enkargá ku enseñansa a duna palabra na e direktivanan mes pa nan elaborá riba tur e situashon problemátiko i violento den i rònt di skolnan. E direktiva di skolnan a trese dilanti ku nan ta sinti ku hopi biaha e problemanan ta originá dor di desekilibrio sosial emoshonal, salú mental no balansá i famianan disfunshonal i esaki nan ta hiba na tentamentu i bringamentu.

A palabrá ku lo kontinuá ku e reunionnan aki i lo amplia ku e Ministerio di Desaroyo Sosial, Labor i Bienestar i Ministerio di Salubridat Públiko, Medio Ambiente & Naturalesa. Pa asina huntu sigui traha riba posibel solushonnan i mes momentu e ministernan a indiká di elaborá riba e tema aki ku nan otro kolega ministernan den konseho di Minister.

**Riba e potrètnan athunto por tuma nota di e reunion di e dos ministernan, nan timnan di maneho i e direktivanan di skolnan.

MAS NOTISIA

Ministerio konserní: Enseñansa, Siensia, Kultura & Deporte