Publiká riba 19 Febrüari 2025
WILLEMSTAD – Resientemente, Ricardushuis a bishitá Konseho di Minister pa duna inisio na nan periodo di kolèkte anual. Durante e reunion, representantenan di e fundashon a informá e ministernan tokante e mishon di Ricardushuis i e trabou ku e ta hasi, kual ta ofresé kuido i guia na ansianonan na Kòrsou for di aña 1954.
Ricardushuis, lokalisá na Santa Rosaweg 52, ta un di e sinku instansianan di Fundashon Birgen di Rosario. E fundashon akí ta aktivo ya 75 aña i ta un di e proveedornan di kuido prinsipal na ansianonan interná i semi-interná riba nos isla.
Durante e bishita representantenan di Ricardushuis a enfatisá importansia di e kolèkte anual pa garantisá kontinuidat i kalidat di e kuido. E fondo rekoudá ta wòrdu utilisá pa mehorá fasilidatnan, sigurá ku por sigui ofresé aktividatnan di dia i duna kuido médiko na e habitante. Konseho di Minister a ekspresá nan apresio pa e trabou dediká ku Ricardushuis a bin ta desplegá i ta hasi un yamada na komunidat pa mustra nan generosidat durante e periodo di kolèkte.
