Publiká riba 09 Aprel 2020
Willemstad – Awe mainta a tuma lugá un reunion di Konseho di Minister di Reino (RMR), den kua Minister Plenipotensiario di Kòrsou Anthony Begina a partisipá na nòmber di nos pais. Durante e reunión a papia entre otro tokante e petishon pa yudansa finansiero agudo (pa un periodo di 3 luna) ku Kòrsou a entregá 1 di aprel 2020 na Minister Knops i Minister Rutte. Konforme e petishon di Minister Knops, e Kolegio supervishon finansiero (Cft) a duna un konseho riba dia 7 di aprel 2020, tokante e nesesidat di likides di Kòrsou pa e luna di aprel.
Saliendo for di e dokumentonan i konsehonan menshoná, RMR awe a disidí lo siguiente:
Pa loke ta trata e pakete di medída di sostén den su totalidat, ku ta kosta NAF 755 mion segun e kalkulashon di Komishon Noodfonds, lo sigui ku palabrashonnan intensivo den e periodo benidero entre e paisnan, pa yega na palabrashonnan struktural i duradero. Gobièrnu a pidi e sosten finansiero parsialmente den forma di ayudo sosial (schenking) dor di hasi apelashon riba artikulo 36 di statuto, ku ta bisa “steunend op eigen kracht, doch met de wil elkander bij te staan” (Traha riba propio forsa, pero ku e boluntat pa yuda otro den momentonan difisil.)
Den kuadro di esei, Gobièrnu di Kòrsou ta enfatisá ku e desishon di RMR di awe ta e promé paso. Lo sigui deliberá i yega na mas desishon tokante e kaminda nos dilanti pa sali for di e krísis aki mas mihó, i mas rápido posibel. E deliberashonnan aki, i komunikashon transparente, ta nesesario pa huntu yega na e mihó vishon i solushon, pa término kòrtiku i largu, pa nos país. Gobièrnu ta konsiente ku tin reakshonnan miksto den komunidat, pa ku e desishon di awe. Tin hende ku ta kontentu i tin hende ku no ta kontentu ku e manera ku nos a haña e promé parti di ayudo.
Gobièrnu ta konsiderá e desishon di awe komo komienso di un trayektorio ku nos a start ku Hulanda. Den esei nos ta hopi konsiente tambe, ku loke nos ta fia, nos mester paga bèk na un sierto momento. I esei por bai forma un peso hopi duru pa nos futuro. P’esei nos lo sigui deliberá, medio di Gobièrnu di Reino, tokante e kaminda struktural pa sali for di e krisis aki.
Gobièrnu ke suprayá ku kada un di nos na Kòrsou mester realisá for di aworaki, ku nos ta drenta un era nobo. Esei kemen ku ora nos a logra kontené e vírùs den nos komunidat ku ménos efekto posibel riba salubridat di nos pueblo, ku esaki no ta nifiká ku nos por ferwagtu di bai bèk na ‘business as usual’. Nos tur mester hasi todo lo posibel pa rekuperá mas pronto posibel.
Pero e realidat amargo ta, ku henter mundu ta sinti e efektonan, i nos mester adaptá na esei, pasobra nos ta dependé pa gran parti di desaroyonan den otro pais. Den kuadro di esei nos mester prepará nos mes pa un par di aña ku doló ekonómiko i finansiero mas severo ku nos a sinti te awor aki. Kada un di nos lo sinti efektonan di e krisis aki, i e ta rekerí un solidaridat nashonal pa por sali afó. Solidaridat nashonal ta nifiká tambe ku kosnan ku no tabata posibel, mester bira posibel, anto mesora. Pasobra solamente asina nos por limitá e periodo di doló. Si nos no tuma e pasonan nesesario, hasta esunnan difisil, e doló ta bai dura muchu mas largu.
Tin varios ehèmpel di proyektonan i leinan ku pa basta tempu kaba ta keda pendiente, manera e opshon pa amtenar baha ku penshun mas trempan boluntariamente, e nullijn pa amtenar, e sistema di supsidio pa fundashonnan ku no ta sufisiente efektivo, e gastunan di e aparato públiko, pasonan pa digitalisashon optimal, ètsétera. Hopi biaha ta trata di aspektonan legal ku ta dura bastante tempu. Nos no mester neglishá lei naturalmente, pero si den e situashon di krisis aki, ta rekerí trayektorianan legal mas rápido, nos mester ta dispuesto pa hasi’é.
