ROC Mondriaan di bishita serka nos - Informashon tokante Gobièrnu di Kòrsou Bo opinion

Notisia

ROC Mondriaan di bishita serka nos

Geplaatst op 26 February 2021 dor di Ministerio Enseñansa, Siensia, Kultura & Deporte

WILLEMSTAD – Regionaal Opleidingen Centrum (ROC) Mondriaan durante di siman di 15 te ku 19 di febrüari 2021 a hasi un bishita na Kòrsou pa un ‘fact finding mission’ pa yega na un koperashon duradero ku skolnan di SBO aki. Durante e bishita na Kòrsou, e delegashon di e skol a sinta ku Minister di ESKD sr. Steven Croes i ku diferente funshonario di Ministerio di Enseñansa, Siensia, Kultura i Deporte (ESKD) pa konosé nos sistema edukashonal pa tende di e retonan ku e sektor di horeca i turismo den enseñansa ta konfrontando. ROC Mondriaan ta un skol internashonal riba nivel di SBO (MBO) ku a bin pa explorá e posibilidat pa establesé na Kòrsou atrabes di un koperashon estrecho ku skolnan SBO i otro ‘stakeholders’ den e sektor di horeca i turismo.

Tambe a deliberá kon un koperashon ku un instituto manera ROC Mondriaan por fortifiká loke Kòrsou ta brinda na nos hòbennan i dosentenan den e sektor. Durante e siman ROC Mondriaan a bishitá skolnan Maris Stella SBO (RKCS), Nilda Pinto SBO (DOS), Jacques Ferrandi VSBO (DOS), Marnix VSBO (VPCO) i Universidat di Kòrsou. Tambe nan a sinta i deliberá ku Ofisina di Turismo, CHATA  i Academy Hotel tokante e retonan ku e sektor ta enfrentando pa ku servisio i personal di kalidat.

E delegashon di ROC Mondriaan a keda impreshoná di tur loke nan a mira i ta kere sigur den un posibilidat pa un koperashon estrecho ku skolnan na Kòrsou. Nan a duna di konosé tambe ku Ministerio di Enseñansa, Kultura i Siensia di Hulanda (OCW) ta sostené e posibel koperashon aki.

Minister Steven Croes a enfatisá e importansia pa e koperashon ta sostenibel. Horeca i turismo ta un di e pilarnan mas grandi den nos sektor ekonómiko i enseñansa avansá ku ta tin un ròl importante. Formashon di personale kualifiká pa e sektor aki ta krusial pa e desaoyo duradero. Kontinuidat den renobashon i modernishashon i formashon profeshonal ta importante pa un konekshon riba e merkado laboral.

Un koperashon entre ROC Mondriaan i Kòrsou por nifiká un fortifikashon di nos enseñansa i por ta di gran balor pa kresementu positivo den enseñansa avansá den ambos pais den reino. Ministerio di ESKD ta apoyá e koperashon aki i lo ke krisalisé a korto plaso den forma di un protokòl di koperashon. Pesei na final di e bishita a hasi entregá na ROC Mondriaan di un karta kaminda e ta ekspresá e deseo i disponibilidat pa riba tèrmino kòrtiku yega na un koperashon entre ROC Mondriaan i Ministerio ESKD.

**Riba e potrètnan athunto por tuma di e reunionnan huntu ku Minister-President sr. E. Rhuggenaath, Minister Plenipotensiario sr. A. Begina , Minister sr. S.Croes i representatnenan di ROC.

 

Ministerio konserní