Publiká riba 30 Yüli 2018
Willemstad – Minister Zita Jesus Leito huntu ku Servisio pa Planifikashon Urbano (ROP) ta anunsiá ku a otorgá pèrmit di konstrukshon na e proyekto di apartamento situá na Landhuis Stadsrust. Proyekto Landhuis Stadsrust ta representá pa BSL N.V. i e kompania aki lo hasi un invershon di mas o ménos 15 mion di dòler. E proyekto ta enserá konstrukshon di 60 apartamento, huntu ku áreanan di rekreashon manera pisina, gym, ofisina di dòkter, i un kapsalon/barberia pa uso interno.
E konstrukshon ta enserá dos diferente tipo di apartamento;
Den su totalidat esaki ta konta pues ku konstrukshon di 6o unidat di apartamento. BSL ta splika ku e parti rekreashon di e proyekto lo ta aksesibel únikamente pa e habitantenan di e apartamentonan. Landhuis Stadsrust lo keda intakto den su totalidat, ounke esaki no ta un monumento protehá. BSL a tene debido kuenta ku e molèster di awa ku e área ta risibí ora di áwaseru, tambe a tene kuenta ku molèster den e parti ambiental pa ku e drenahe di awa.
Durante ehekushon di e proyekto, lo hasi uso di diferente kompania den e área di konstrukshon i tambe di kontratista. Pa kuminsamentu di ougùstùs lo kuminsá ku limpiesa di e tereno, pa despues start ku konstrukshon.
Habitantenan den e área a risibí informashon direkto di BSL i di Ministerio di Tráfiko, Transporte i Planifikashon Urbano (VVRP) atraves di enkuentro di informashon, den kual habitantenan a risibí splikashon amplio di e proyekto i a hasi palabrashon direkto pa minimalisá posibel molèster den futuro pa habitantenan direkto i indirekto.
Servisio pa Planifikashon Urbano (ROP) ta e organisashon di Gobièrnu ku ta sòru pa uso duradero i balansa di e espasio di Kòrsou. ROP ta evaluá petishonnan pa desaroyonan urbano nobo i situashonnan aktual pa sòru ku nan ta kumpli ku e nivel di kalidat ku e maneho di Gobièrnu ta stipulá. E responsabilidat di ROP ta konsistí di ordená i duna forma na e espasio públiko di Kòrsou.
Pa pregunta general tokante pèrmit di konstrukshon òf kualke aspekto di planifikashon urbano, por tuma kontakto ku ofisina di ROP via e number 433-3200. Por manda Whats app na number di telefòn +5999511-8582 òf por manda e-mail na info.rop@gobiernu.cw.
