Notisia

ROP TA HASI UN YAMADA PA MANTENÉ I DRECHA EDIFISIONAN RIBA RUTA DI KARNAVAL

Geplaatst op 26 January 2018 dor di Ministerio Tráfiko, Transporte i Planifikashon Urbano

Willemstad – Minister Zita Jesus-Leito huntu ku Servisio pa Planifikashon Urbano (ROP) ta pidi tur doño/ habitante ku tin edifisionan riba ruta i den bisindario di e ruta di karnaval pa laga kontrolá i drecha kondishon di e edifisionan. Laga nos tur huntu gosa di un temporada dushi di Karnaval, ban traha drecha i mantené edifisionan ku ta den mal estado.

Desèmber di aña 2017 representante nan di diferente servisio di Gobièrnu a hasi un inventario riba e ruta di karnaval, ROP a forma parti di e grupo aki. E grupo di inspekshon a detektá vários edifisio den mal estado.

Kriterionan pa determiná ora un edifisio ta den mal estado ta lo siguiente:

• Material di palu bieu ku no por garantisá su efektividat i aporte na seguridat,
• Dak putri,
• Indikashon di humedat,
• Sker i erupshon di muraya i flur,
• Muraya di paden a kai den otro,
• Parti di e flur a sak,
• Awa ta pasa dor di muraya,
• Panchi di dak ta los,
• Muraya ku ta presentá instabilidat, kibra i òf habri for di otro,
• Het (goot) kibra, ku sker òf mata ku ta krese den nan.

 

Teps nan pa mantené i evitá ku edifisio nan ta bai den mal estado ta dor di:

• Limpia het (goot) i drecha skernan den het (goot),

• Kontrolá e dak si tin buraku, panchi òf otro partinan di dak los,
• Drecha skernan den muraya i pleister los na muraya,
• Buska pa sa dikon tin vògt den muraya i den plafòn i drecha esaki.

Den kaso ku ta deseá un konseho relashoná ku reparashon na e monumento protehá por tuma kontakto ku ofisina di ROP via e number di telefòn +5999433-3200. Por manda Whats app na number di telefòn +5999511-8582 òf por manda e-mail na info.rop@gobiernu.cw

Ministerio konserní

• Tráfiko, Transporte i Planifikashon Urbano