Rumbo pa un sistema di prekario pa Karnaval modernisá i digitalisá
Publiká riba 02 Febrüari 2024
Willemstad – Prekario Karnaval a enfrentá diferente reto durante e periodo di Karnaval 2024 aki. E tim ta trahando pa mas pronto ku ta posibel pa atendé ku tur situashon ku a presentá.
Atraves di añanan, nos komunidat a bin ta selebrá Karnaval, i e struktura di prekario tambe a bin ta desaroyá. Den 2024 a introdusí un sistema modèrno i digitalisá. E tim por a mira tur e espasionan disponibel riba un mapa digital. Esaki a trese kune ku terenonan disponibel ta segun un midí i espasio eksakto. Den praktika a resultá ku algun pèrmit di prekario a skuif un tiki pa kuadrá ku e midínan eksakto ku tin den kada pèrmit.
Ta hasi un apelashon na tur doño di pèrmit di prekario pa mantené e kantidat di meter indiká riba e pèrmit, i konstruí segun e reglanan stipulá.
Na momentu ku kualke iregularidat presentá, por tuma kontakto di e siguiente formanan:
- Yamada: di djaluna pa djabièrne parti mainta na 511-3874,
- Whatsapp: por manda mensahe na 511-3874 na kualke momentu.
Tim di Prekario lo atendé esakinan mas pronto posibel.
Di e forma aki tambe, nos komunidat por selebrá Karnaval den un forma dushi i bon organisá.