Bo opinion

Notisia

“Salariskompas-Loonwijzer” ta krusial pa yuda un hóben

Geplaatst op 12 December 2018 dor di Ministerio Enseñansa, Siensia, Kultura & Deporte

Un indikadó manera “Salariskompas-Loonwijzer” ta krusial pa yuda un hóben skohe un estudio i profeshon den futuro!

Minister di Enseñansa, Siensia, Kultura i Deporte (ESKD) sra. Minister Marilyn Alcalá-Wallé na nòmber di Kabinete Rhuggenaath a ofisialisá instalashon di e “Werkgroep Salariskompas-Loonwijzer”.Ministerio di ESKD su empeño ta pa informá e.o e studiantenan di antemano tokante indikashon di salarionan ora ke skohe e diferente profeshonnan. Den e kuadro aki nan ta haña mas instrumento pa skohe mas konsiente ora nan ta skohe pa un estudio i e nivel di fiansa ku nan ta hasi, di manera ku ta krea debenan di estudio pagabel ora nan subi merkado laboral.

Pa informá i konsientisá e studiantenan i tambe e komunidat di Kòrsou, ta sumamente importante pa un i tur por disponé di informashon aktual i konkreto tokante e salario ku ta pertenesé na kada profeshon. Te ku awor e informashon aki no ta disponibel na Kòrsou. P’esei Minister di ESKD, señora Marilyn Alcalá-Wallé, a tuma e inisiativa pa instalá un grupo di trabou pa por kumpli ku e nesesidat aki. Ademas ta imperativo pa prinsipalmente tur studiante di Kòrsou ta konsiente di tur e implikashonnan ku un debe di estudio haltu por trese kuné i kon esaki por afektá e futuro finansiero di nan i nan futuro famia. Hopi ta realisá esaki despues di e estudio i ora di paga bèk.

Den kuadro aki a instalá e grupo di trabou ya menshoná ku ta konsistí di diferente eksperto saliendo for di diferente disiplina, kual ta: un representante di Ministerio di ESKD, direktor di maneho di ministerio di ESKD, un representante di ministerio di Desaroyo Sosial, Labor i Bienestar. (SOAW), unu di ministerio di Desaroyo Ekonómiko, unu di Ministerio di Maneho di Gobernashon, Planifikashon i Servisio Públiko, i tambe unu di S.S.C. E grupo di trabou ta entregá resultado di e trabou aki den e promé mitar di 2019. Ku esaki dentro di poko komunidat i studiantenan i tur esnan ku ta laborá tin un sistema digitalisá ku nan tur por konsultá ora nan ke haña un bista di e entrada promedio ku ta mará na kada profeshon.

E werkgroep aki tin e siguiente tareanan:

a) Hasi un inventarisashon di e diferente profeshonnan ku tin riba merkado laboral, tantu na gobièrnu komo den sektor privá;

b) Traha un resúmen di e salarionan pa e diferente profeshonnan ku tin na Kòrsou;

c) Inventarisá e salario mínimo I máksimo di kada profeshon;

d) Establesé un sistema di informashon digital kaminda e informashon tokante e salario di e diferente profeshonnan ta bira aksesibel pa komunidat di Kòrsou;

e) Reportá na Konseho di Ministernan na un base regular tokante e avansenan di e diferente trabounan.

Di e forma aki gabinete Rhuggenaath ta sigui hasi su máksimo esfuerso pa evitá ku e problemátika di debenan di estudio fuera di proporshon ta sigui krese i alabes garantisá oportunidat pa nos hóbennan i nos komunidat por sigui estudionan segun nan kapasidat pero manteniendo e debe di estudio den un márgen pagabel.

Riba e foto por mira e grupo di trabou (SOAW no tabata presente). Di robes pa drechi: sra. Dainadira Martis (CBS), sra. Ada Tromp (SSC), sra. Susan Larmonie-van Heydoorn (Direktor di Maneho ESKD i alabes Presidente di e Grupo di Trabou), Minister Alcalá-Wallé, sra. Rosita Rog/ Rossy Reyna i sra. Mary-Rose Rosalia (MEO).

Ministerio konserní