Samira Rafaela di bishita serka promé minister di Kòrsou, sr. Eugene Rhuggenaath - Informashon tokante Gobièrnu di Kòrsou Bo opinion

Notisia

Samira Rafaela di bishita serka promé minister di Kòrsou, sr. Eugene Rhuggenaath

Geplaatst op 12 November 2020 dor di Ministerio Asuntunan General i Promé Minister

WILLEMSTAD-  Samira Rafaela, miembro di Parlamento Oropeo, tabata di bishita na Kòrsou durante e promé siman di novèmber 2020. E bishita aki tabata pa por bolbe interkambiá riba diferente tópikonan di interes.

Djaweps, dia 5 di novèmber último, Promé Minister di Kòrsou, sr. Eugene Rhuggenaath a hiba un kòmbersashon ekstenso i fruktífero ku sra. Rafaela riba diferente aspekto di importansia pa e relashonnan di trabou i kolaborashon entre Kòrsou i Hulanda (Oropa).

Durante e bishita aki, Minister Rhuggenaath i sra. Rafaela entre otro a toka e tema di e akuerdo di desaroyo i reforma ku resientemente a keda firmá entre Gobièrnu di Kòrsou i Gobièrnu di Reino. Tambe a kòmbersá riba e terser transh ku Kòrsou lo mester risibí, e sosten di likides i mas ku klaro a papia tambe riba e palabrashonnan di koperashon i kolaborashon entre e dos paisnan.

Riba e tópiko aki, Minister Rhuggenaath a ekspresá su deseo pa mas enbolbimentu di Kòrsou su diáspora pa di e forma aki duna mihó kontenido na struktura di e kolaborashon aki i a pidi sra. Rafaela spesífikamente pa, komo miembro di Parlamento Oropeo, dediká èkstra atenshon na esaki.

Samira Rafaela di su banda a ekspresá di ta mira un konekshon entre Union Oropeo i e akuerdo di desaroyo i reforma ku a keda firmá  entre Kòrsou i Gobièrnu di Reino. Segun sra. Rafaela su opservashon, esaki ta e momentu perfekto pa Kòrsou sera mas kolaborashon ku Union Oropeo pa asina haña akseso na fondonan manera por ehèmpel e fondo Horizon 2020 riba tereno di siensia i BEST 2.0 riba e tópiko di biodiversifikashon. Riba esaki, Minister Rhuggenaath enberdat ta mira puntonan di referensia entre Kòrsou i Union Oropeo.

Durante e kombersashon aki a toka tambe e tema di relashonnan komersial den region i e negosiashonnan nesesario riba tratadonan manera Mercosur ku ta basá riba e relashonnan ekonómiko entre paisnan Sur-Amerikano manera Argentina, Brasil, Paraguay i Uruguay, pero tambe e tratado post-Cotonou ku ta un tratado entre Union Oropeo i e paisnan konosí komo ‘ACS landen’. ‘ACS landen’ ta un total di 79 pais prosedente di e kontinente Afrikano, region Karibense i Oseano Pasífiko ku tin un relashon spesial ku Union Oropeo basá riba kolaborashon ekonómiko, kolaborashon di desaroyo i promové derechonan humano i di demokrasia.

Por último Promé Minister Rhuggenaath i sra. Rafaela a kombersá ekstenso riba e tópiko di Venezuela i e posibel konsekuensianan di e situashon aki pa Kòrsou i e stabilidat di Reino i region. Ku esaki, Minister Rhuggenaath por a haña un bista amplio kiko ta e punto di bista di Union Oropeo riba e tópiko aki i spesífikamente opinion di Parlamento Oropeo.

Ministerio konserní