Publiká riba 13 Sèptèmber 2019
Willemstad – Ministerio di Salú, Medio Ambiente i Naturalesa (SM&N) ta bai lansa un proyekto titulá; ‘Sangura ta Asuntu di Nos Tur’. Meta di e proyekto aki ta pa komunidat huntu ku e mundu komersial, edukashon, gruponan sosial, di salú i otro gruponan di importansha den nos komunidat, yuda solushoná den un forma kolektivo, duradero i struktural e problema di sangura.
Último 5 añanan pueblo di Kòrsou a eksperenshá dos epidemia ku a keda okashoná pa e sangura Aedes aegypti. Ta trata aki di e malesanan Chikungunya i Zika. I no lubidá e malesa di Dengue ku semper bai ta mei mei di nos i ta drumi warda oportunidat pa keda plamá pa e mesun sangura.
E sangura aki solamente lo keda eliminá di un manera duradero tanten nos keda kòrda e dolónan ku e sanguranan aki a kousa den pasado. Ainda tin hende ta sinti e efektonan di e malesanan di Chikungunya, tambe e pèrdidanan grandi kalkulá na orarionan produktivo di trabou kousá dor di e sangura Aedes aegypti. Si nos tur, esta komunidat kompletu, sigui instrukshonnan spesífiko pa kita òf laga kita artefaktonan manera bleki, tayer, baki awa, artefaktonan doméstiko ku ta wanta awa, pòchi mata etcetera for di kaminda i stroba e sangura di pone su webunan, nos ta riba e bon kaminda pa kaba ku e sanguranan aki. Den dianan ku ta bai bin komunidat lo ripará vários aktividat relashoná ku kombatimentu di en partikular e sangura Aedes aegypti.
Ademas di e kòntròlnan diario di kontrolá kas-pa-kas pa wak si tin fokonan kaminda sangura ta brui, ekspertonan di THZ lo bai duna trainingnan dirigí na gruponan, lo bai tene seshonnan di informashon den bario, duna kursonan kòrtiku na skolnan i tambe na gruponan di importansha. Lo hasi uso di medionan soshal i komun. E seshonnan di training i informashon ta enserá: e kustumber di e sangura, kon esaki ta desaroyá i kiko mester hasi pa e sangura no desaroyá, kon malesa ta desaroyá den sangura i kon pa para e siklo di transmishon aki, kon por protehá bo mes kontra piká di sangura, kiko bo mester hasi ora bo tin problema ku sangura, kiko ta e bentahanan ora abo i/ òf bo bisiñanan no tin fokonan kaminda e sangura por pone su webu.
E strategia aki ta basá riba guianan establesé pa organisashonnan internashonal manera PAHO/ WHO. Kaminda komunidat mester di ayudo, Ministerio di SM&N ta pará kla pa duna esaki dor di duna instrukshon, informashon i eduká i tambe kaminda ta nesesario intervení. Pa mas informashon por tuma kontakto ku señor Leito via number di telefòn 432 2867.
###
