E evento di apertura ta konsistí di un programa kargá ku presentashon musikal, torneo di dominó i inisiativa edukativo pa yudá stimulá e konsenshi kultural i orguyo di nos herensia. Keda pendiente pa publikashon di e programa ofisial. Siman di Kultura 2024 ta pone énfasis riba e traspaso inter generashonal di nos kultura, kaminda grandi i chikí ta siña di otro. Den e siman akí pueblo di Kòrsou por organisá tayernan kaminda ku por ehèmpel grandinan ta pasa konosementu di tradishonnan di kushina, arte i historia na nos hubentut. Skolnan i organisashonnan ta keda invitá pa organisá aktividatnan ku ta poné grandi i hubentut huntu pa preservá i fortalesé nos herensia kultural. E meta ta pa inspirá tur hende pa kontribuí na mantenshon di nos kultura di forma ku nos tur ta bib’é!
Sektor di Kultura i Deporte, ta motivá famianan, skolnan, grupo di bario, kasnan di hende grandi i organisashonnan pa partisipá i selebrá e siman spesial akí. Siman di Kultura 2024 ta mas ku simplemente un siman di aktividat; ta un oportunidat pa nos uni i preservá e esensia di nos identidat kolektivo. Ban selebrá, partisipá i sigurá ku nos kultura ta keda bibu i vibrante.
