Publiká riba 19 Sèptèmber 2022
Durante di selebrashon di Siman di Kultura, nos ta kontinuá ku e strategia pa konsientisá nos komunidat riba tópikonan ku ta stimulá bienestar pa pueblo di Kòrsou i e aña aki nos lo konsientisá riba e tema di plantamentu.
Minister di Enseñansa, Siensia Kultura i Deporte, sr. Sithree van Heydoorn ta preparando huntu ku Sektor di Kultura i Deporte aktividatnan pa skolnan, barionan for di Band’ariba te Band’abou pero tambe den Luna Blou. Tambe ta uni forsa ku e Komishon Nashonal ku ta promové implementashon di metanan sostenibel pa Kòrsou pa asina pone énfasis riba kultura i futuro. E motibu ku ta kombiná e Siman di Kultura ku e Siman di Akshon pa metanan sostenibel, ta pa e echo ku anualmente mundu i tambe na Kòrsou ta para ketu durante e luna di september riba e metanan pa desaroyo sostenibel. E diferente SDG-nan ta promové bientestar di hende, planeta, prosperidat i kultura ta kore manera un liña kòrá den e esfuerso pa logra e metanan aki.
Ku e tema “Ban Kunuku Ban Planta”, Gobièrnu di Kòrsou ta pone atenshon, riba e preokupashon ku tin den komunidat ku mester bin bèk ku plantamentu, kosecha i produkshon di nos mes kuminda. E nifikashon di “Ban Kunuku ban Planta” ta keda ehekutá tantu den su konsepto literal komo den su konsepto figurativo durante di e siman di kultura. Den su konteksto real nos ke logra sigui stimulá pueblo pa planta i kosechá pero tambe komementu salú. E dimenshon figurativo ta mas riba e área di e dimenshonnan di Bienestar pa nos presente i futuro, nos mester sigui stimulá nos pueblo pa nos kosecha un pueblo mas Sano, Salú i Sigur.
Pa fortifiká i promové e metanan sostenibel e komishon enkargá ku esaki lo promové durante di 23 pa 30 di sèptèmber 2022, aktividatnan manera entre otro webinarionan, training i tayernan. Esakinan ta pa alsa e konsiensia i alsa e partisipashon aktivo di e pueblo di Kòrsou riba e diferente SDG-nan ku ta promové bienestar di hende, planeta i prosperidat.
Pa medio di e komunikado akí Gobièrnu di Kòrsou, ta invitá pueblo di Kòrsou kompletu pa partisipá aktivamente na “Siman di Kultura 2022” i siman di “Akshon pa Metanan Sostenibel”. Si bo ke mas informashon òf bo ke kompartí ku nos, bo programa pa ku Siman di Kultura 2022 i siman di Akshon pa “Metanan Sostenibel” por tuma kontakto ku nos na;
