Publiká riba 22 Òktober 2018
Willemstad – E kolaborashon ku a inisiá entre di gerensia di skol Mgr. Willem Ellis pa loke ta trata drechamentu di 1320 buki di e skol ku tabata kibrá ya pa basta tempu, a finalisá. Resientemente SDKK a entrega den persona di un kliente ku tabata responsabel di supervishon di e proyekto aki, sr. E. Pasqual, kompaña pa dos trahadó di e Unidat di Korekshon. E trabounan a bai hopi bon, asta ku e klientenan ku tabata asigná pa ehekutá e proyekto a duna sierto konseho na e skol pa loke ta trata e manera kon pa drecha e bukinan den un forma mas duradero i barata. E kliente Pasqual ku a bai pa hasi e entrega a hiba palabra na gerensia di skol Mgr. Willem Ellis. Sr Pasqual a enfatisá ku nan ta orguyoso ku a skohe nan komo klientenan di SDKK pa hasi e trabou bunita aki. Durante di drechamentu di e bukinan nan tambe por a lesa tuma nota di e tipo di informashonnan ku e muchanan ta haña na skol. Pa nan tabata un bon oportunidat di mustra ku nan ke pa pueblo di Kòrsou mira nan, los di e echo ku nan ta detené den SDKK, komo un grupo di hende ku tambe tin nan potensial i ku ta sigui kere den nan talentonan. E skol tabata hopi kontentu i a gradesido na Tim di maneho di SDKK pa por a kolaborá i ainda mas tantu na e klientenan di SDKK ku kier a invertí nan tempu balioso den drechamentu di e bukinan pa nos muchanan ku tambe ta nos futuro generashon.
Komo gesto pa e klientenan di SDKK kua yuda drecha e bukinan, gerensia di skol Mgr. Willem Ellis, a hasi un donashon di 50 florin pa asina SDKK por kumpra algu di smak riba petishon di e klientenan. Tambe nan a duna un karchi kaminda nan a ekspresá nan gratitut. Na e mesun momentu SDKK a haña e sobra kahanan ku buki ku mester wòrdu drechá. Ainda falta basta buki pa wòrdu drechá. E klientenan di SDKK lo sigui ku plaser pa yuda nos muchanan i komunidat en general.
