SDKK finalisá aña 2018 ku kampionato di ‘Domino 200 tantu’ bou di su klientenan - Informashon tokante Gobièrnu di Kòrsou Bo opinion

Notisia

SDKK finalisá aña 2018 ku kampionato di ‘Domino 200 tantu’ bou di su klientenan

Geplaatst op 14 December 2018 dor di Ministerio Hustisia

Willemstad – Manera a partisipá na luna di òktober último e inisio di e klínika di ‘Domino 200 tantu” den SDKK, bou di guia di nos talento lokal ku ta e gran maestro sr. Jean-Mark “Gin” Welvaart.  E klínika, e kompetensia i e kampionato aki tabata posibel pa medio di esfuersonan inter ministerial (Ministerio di Hustisia i  Ministerio di Enseñansa, Siensia, Kultura i Deporte) i sektor privá, ku a uni forsa pa mustra e vishon i mishon kompartí pa loke ta trata entre otro e desaroyo artístiko kultural i mental di e klientenan detené den SDKK. SDKK ta gradisí e dos kompanianan lokal ku a hasi donashon di e sètnan di dominó ku ta wòrdu uzá durante e klínika, kompetensia i kampionato.

E klínika i kampionato tabata a base di e sistema di dominó di konta punto, òf mihó bisá “Dominó 200 tantu”. Bou di inisiativa di Tim di Maneho di SDKK i bou di guia di e dos Guiadó di Aktividatnan di SDKK, a inisiá na luna di òktober 2018, un klínika i kompetensia di dominó pa 14 departamento. E klínika, ku mester a dura 2 siman, pa motibunan organisatorio a tuma un tiki mas tempu. E klientenan a hasi bon uso di e oportunidat aki i asina nan a haña mas chèns pa nan por a trein pa e kampionato ku lo a kuminsá dia dia 5 desèmber último i a dura te ku dia 8 di desèmber.

Despues di e klínika, tabatin kompetensia entre e 14 departamento mes kontra di otro i asina a saka e kampionnan. Kada departamento a wòrdu representá dor di 2 kliente.

Henter e trayekto aki di klínika i kampionato a wòrdu guiá, manera nos a menshoná kaba, dor di sr. Jean-Mark “Gin” Welvaart.  Manera pueblo di Kòrsou sa, den pasado sr. Welvaart a sa di titulá na vários okashon ‘Kampion di Kòrsou’ i tambe internashonal. Den kampionatonan mundial Sr. Welvaart kasi tur aña ta den e tòp 10 di mundu. Na aña 2012 na Valencia (Venezuela.) sr. Welvaart a yega te na e puesto number 2 di mundu.

Sorpresa tabata ora ku un kliente ku a wòrdu transladá pa Kòrsou, pa motibu di e orkan Irma, aña pasa, a bira un di e kampionnan. E hóben aki a tuma e libertat despues di e kampionato pa manda un karta di gradisimentu pa Minister Quincy Girigorie, Minister di Hustisia di Sint Maarten sr. C De Weever i Tim di Maneho di SDKK. Nos a tradusí e karta i e kontenido ta bisa lo siguiente: “Na nòmber di e klientenan di Sint Maarten aktualmente detené den SDKK, ami, Rolandito Richardson lo ke yama danki na e Unidat di Korekshon pa por a duna nos e oportunidat pa ta parti di e promé torneo di Domino 200 tantu, organisá den SDKK. Pa ami tabata un eksperensia plasentero. Mi a haña chèns di ‘show off’ mi talentonan di domino, pa representá mi blòk ku ta blòk 8 i alabes representá Sint Maarten na e mesun momentu. Na final Dios a hari ku i riba mi. Mi man den e kompetensia i ami a sali e kampionnan indiskutibel. Tabata un evento unisèks, es desir ku klientenan maskulino i femenino a partisipá huntu. Komo un kliente den SDKK mi por bisa ku e evento aki a pasa sin niun klase di problema i nos por konsiderá esaki komo un éksito rotundo. E kampionato a dura 4 dia  i 40 kliente a partisipá en total. Ta parti di nos proseso di resosialisashon pa nos por kombibí i komuniká riba un nivel asina sano i deportivo ku otro, lòs di loke nos tur a hasi, ku ta e motibu ku nos ta sera den SDKK. Pa HUNTU nos komuniká i logra tur éksito ku nos ke, hasiendo kosnan positivo. Danki na SDKK un biaha mas pa duna nos hende hòmber- i hende muhénan e oportunidat pa relahá nos mente i tin gosa drentando e temporada di fin di aña. Masha danki i Un Bon Pasku i Un felis aña 2019 pa tur hende di bon boluntat”.   

Un komunidat eduká, formá i ku étika (norma i balornan haltu) i empatia pa su kosiudadano ta forma un komunidat ku por bria awor i den futuro. SDKK ke ta parti di e desaroyo aki ku riba tereno di formashon ta bai pa ekselensia.

 

Ministerio konserní