Publiká riba 06 Ougùstùs 2026
Durante e último tres djasabranan, 18 di yüli, 25 di yüli i 1 di ougùstùs 2026, Departamentu di Enseñansa, Formashon i Training (OVT) di Sentro di Detenshon i Korekshon Kòrsou (SDKK) a organisá pa promé biaha un Plan di Fakansi.
Na e proyekto spesial aki a partisipá 17 kliente (tata i mama) huntu ku 25 yu ku edat entre 3 te ku 13 aña.
Durante e tres djasabranan aki, e departamentu di OVT a kambia den un berdadero paraiso festivo, kaminda mayornan i yu a pasa momentunan inolvidabel huntu. Nan a kushina huntu dor di traha hamburger i tambe arepita, hasi obra di man, a hunga diferente wega di kompetensia,bingo i quiz, a brasa otro i kombersá, a kome i bebe, i mas importante ainda, a disfrutá di hopi momento yen di alegria i goso huntu. Tur sonrisa i kada momento kreá lo keda pa semper den kurason di tur esnan ku a partisipá.
Ku e inisiativa aki, personal di OVT kier kontribuí na fortalesé i restablesé e relashon entre mayornan i nan yu. Aunke un persona ta den detenshon, su papel komo tata òf mama ta sigui di gran balor pa desaroyo i bienestar di un yu. Dor di reuní mayornan i yu den un ambiente positivo i seif, SDKK ta invertí den konekshon, restablesimentu i un futuro mihó.
Riba 1 di ougùstùs 2026 tabata e final di e fakansi plan ku diferente wega i kushinamentu, tambe a será e dia kantando Happy Birthday pa un di nos chikitin nan ku a hasi aña i a haña e oportunidat di selebrá su aña den kompania di su tata i otro muchanan presente.
Pa keda ku un rekuerdo duradero di e tres dianan speshal aki, tur mayor i yu a risibí un sertifikado i un leshi ku potrèt di famia i tambe un tas yena ku artíkulonan di skol.
OVT ta ekspresá su apresio profundo na tur klientenan ku hopi dedikashon i entusiasmo, a yuda pa hasi e proyekto aki un gran éksito. Tambe nos ta gradisí di kurason na tur koleganan di e diferente departamentunan ku a kontribuí ku nan tempu, kompromiso i entusiasmo pa hasi posibel ku e mayornan i nan yunan por a disfrutá di tres djasabra realmente inolvidabel.
Ku e Plan di fakansi, SDKK ta mustra ku resosialisashon no ta trata solamente di edukashon i kambio di komportashon, sino tambe di mantené i fortalesé e relashon familiar. ‘
Un relashon fuerte entre mayornan i yu ta un base importante pa un reintegrashon eksitoso den nos komunidat.
Departamento di Enseñansa, Formashon i Training
Sentro di Detenshon i Korekshon Kòrsou
