Publiká riba 07 Novèmber 2019
WILLEMSTAD—Sentro di Detenshon i Korekshon Kòrsou (SDKK) a kompetí ayera dia 6 di novèmber, pa medio di nos kliente Gilberto Baldovino na e aktividat anual di premionan inovativo. Ta di 21 biaha ku Ministerio di Desaroyo Ekonómiko ta organisá pa medio di Curaçao Innovation and Technology Institute e aktividat prestigioso aki.
SDKK a kompetí den tres kategoria. E kategorianan tabata premio Sosial Inovativo, premio Duradero Inovativo i e premio di Eskoho di Públiko. SDKK a gana dos di e premionan ku ta e premionan Sosial- i Duradero.
Den e proyekto aki e kliente a usa material resiklá i otro tipo di materialnan pa traha produktonan manera tas, pèchi, pòtmòni, slòf ets.
Ganando e premionan aki SDKK ke hasi uso di e oportunidat aki pa stimulá otro nan, no solamente den SDKK, pero pueblo di Kòrsou kompletu, mirando kon nos ekonomia ta bayendo, ku bo por hasi uso di bo mannan di un forma positivo pa bo por kome di dje.
Pa ku resosialisashon esaki ta un di e metanan mas ku a wòrdu lográ. Kaminda ku nos ta rekonosé talento serka e persona ku ta detené i no para ketu na nan echo kastigabel so. I kaminda ta duna oportunidat pa talentonan krese, einan e ta krea forma. I esaki ta netamente e oportunidat ku SDKK ta brinda kada un di nos klientenan pa konsientisá otro i konsientisá komunidat kompletu.
Un biaha mas SDKK ta yama danki na tur ku a sa di sostené nos i spesialmente nos kliente Gilberto Baldovino, i kere den e proyekto noble aki.
Nos lo sigui perseverá den tur nos proyekto- i trayektonan di resosialisashon den SDKK. Nos lema prinsipal ta keda: pensa positivo, aktua positivo i siña traha huntu na un manera positivo, pa huntu nos por logra e tipo di metanan positivo aki.
