Publiká riba 09 Desèmber 2019
Willemstad – Dia Internashonal di Derechinan Humano ta konta pa tur ser humano, es desir ku tur hende tin derechi. Esaki ta konta, i por ta e ta zona straño den orea di hopi hende, asta pa esnan ku ta den detenshon den Sentro di Detenshon i Korekshon Kòrsou.
Dia 10 di desèmber di aña 1948 e deklarashon importante aki, Derechi Universal di Derechinan Humano, a wòrdu instituí dor di Nashonnan Uni.
Tur hende ta nase liber i igual den nan balor komo ser humano. Tur hende tin e mesun derechinan humano. Sin distinshon den rasa, kolo, sekso, idioma òf religion. Niun posishon polítiko òf kualke otro kerensia òf status tampoko no ta hasi un hende mas hende ku un otro. Derechinan Humano pa tur hende ta únikamente posibel si tur hende tene kuenta ku e derechinan di e otro hende. Es desir si sierto hendenan eksigí derechinan pa nan mes sin tene kuenta ku un otro hende, òf si nan trata na kita derechinan for di otro hende, esaki ta bai kontra di e punto di salida di e Deklarashon Universal di Derechinan Humano.
Paso e lo zona straño atrobe, pero tin hende ku ta biba den paisnan kaminda ku no ta tene nan mes na derechinan humano. Esaki ta konta por ehèmpel pa pa paisnan kaminda derechinan di hende muhénan, derechinan di muchanan, derechinan di hende ku un hèndikèp i tambe derechinan di detenidonan no ta wòrdu respetá.
De e kaso di detenidonan, konforme e ekspreshon di e Hefe di Unidat di Korekshon na SDKK, sra Malvina Cecilia, ta bèrdat ku nan a kometé un delito i a wòrdu kastigá pa esaki. Siendo Kòrsou ta forma parti di Reino Ulandes, e detenidonan tambe tin sierto derechinan durante di nan detenshon.
Na promé lugá, den kuadro di resosialisashon mester mustra e detenido ku e tin derechi pa siña kon na un manera adekuá e por ekspresá su mes ora e ta papia ku otro hende. Esaki ta importante pa siña komuniká na un manera salú ku otro hende pa evitá mas problema ku ta posibel. Na di dos lugá, un trato desente. Es desir mester siña e detenido kon pa trata otro hende e mesun bon ku e mes ke wòrdu trata. E reto ta pa siña e detenido na un manera profeshonal kon komportá nan mes respetuoso pa ku un otro hende. Na di tres lugá, perspektiva, resosialisashon i kuido despues di su detenshon. Despues di su detenshon e detenido lo bai bèk den komunidat. Ta p’esei tur kos ku hasi durante di su periodo den SDKK mester ta dirigí riba kon e detenido por para riba su pia na un manera positivo. Mester prevení mas daño ku ta posibel durante di detenshon i dirigí mas riba e desaroyo personal. Na di kuater lugá, ora ku e kibra ku reglanan doméstiko den SDKK, e sanshon mester ta dirigí riba kambio di komportashon. Ta p’esei ta importante pa e detenido sa kua ta e reglanan den e instituto i ki ora i dikon e reglanan ta wòrdu apliká. Es desir: “lei pa un i lei pa tur”. Ta p’esei na momentu ku ta sanshoná un detenido a base di komportashon e proporshonalidat (pakiko i kon ta sanshoná, i no por kastigá pa loko) mester ta limitá i mara na reglanan ku tin ku wòrdu kontrolá dor di e direktor di e instituto. Na di sinku lugá, un variashon di programanan di resosialisashon ku tin ku yud’e re–integra den komunidat i mester tin un efekto faborabel riba e detenido su komportashon. Mester sòru pa e detenido siña pa sali na su mes vanguardia i sòru pa su mes, es desir huntu ku e personal di SDKK mester enkurashá i stimulá e detenido pa desaroyá su mes den loke ta wòrdu ofresé na dje. Na di seis lugá, un klima di biba safe. Es desir ku mester evitá ku detenidonan ta kore peliger siendo bou di responsabilidat di SDKK. Na di shete lugá, kuido na momentu ku nan tin sierto malesa, ku por ta ta entre otro sikiátriko òf sikológiko, pa asina evitá posibel ripitishon di un delito. SDKK no tei pa kastigá e detenido, e tei pa detené i korigí e komportashon robes di e detenido, pa asina e sali un mihó hende. I final, e prinsipio di siudadania. Esaki kier men ku durante di detenshon e detenido ta keda forma parti di e komunidat. Es desir ku e tin derechi pa entre otro pa hasi uso di su derechi di vota, tin kontakto ku su famianan i bai korte na momentu ku e no ta di akuerdo ku sierto desishonnan ku a wòrdu tumá kontra di dje.
Sra Cecilia ta sigui splika ku den SDKK su esfuersonan di resosialisashon, lo sigui ta pa implementá programanan di metódikonan sientífiko integral pa, spesialmente e hóbennan, konsiente di nan mes manera di pensa i aktua i ta siña nan pa tuma responsabilidat pa esaki dor di siña traha huntu na un manera positivo. SDKK ta haña ku esaki ta importante, paso dor di siña e persona ku ta detené i sigur e hóbennan detené, ku den tur situashon nan por skohe pa un solushon positivo. Asina aki SDKK ta traha pa pone un fundamentu sólido pa un futuro ku un komportashon positivo i pro sosial.
Pa bo proyekto- i trayektonan di resosialisashon ta efektivo den SDKK mester krea un ambiente positivo den SDKK, pa asina e persona detené i sigur e hóbennan ta wòrdu motivá, ta wòrdu siñá pa yuda otro, papia ku otro ora ku algu fèrfelu pasa i siña di otro.
