SDKK ta atendé konforme protokòl di COVID - Informashon tokante Gobièrnu di Kòrsou Bo opinion

Notisia

SDKK ta atendé konforme protokòl di COVID

Geplaatst op 02 September 2020 dor di Ministerio Hustisia

Awe Gerensia di SDKK a tuma nota di algun informashon den medionan di komunikashon ku ta kuestioná e echo ku un kliente a regresá prisòn dia promé di sèptèmber 2020 sin ku el a pasa karentena.

E kliente akí tabata den libertat temporal riba òrdu di hues.

Regreso di e kliente a bai konforme e protokòl di Gobièrnu di Kòrsou enkuanto COVID-19 di dia 7 di mei 2020.

E kliente tabata den libertat temporal, pa motibu ku no tabatin sèl adekuá p’e por pasa su kastigu aden. Entretantu a adaptá un sèl di un persona kaminda a ubik’é bèk riba òrdu di hues.

Komo tal, e kliente akí ta isolá den su sèl. Esaki ta nifiká ku no tabata nesesario pa e bai den karentena, debí ku su sèl ta kumpli kompletamente ku e posibilidat pa distansia sosial, ku ta e forma di mas efektivo di protekshon kontra COVID. Mas aleu, no tin ningun otro sèl den SDKK ku sí ta kumpli ku e rekesitonan spesial pa e detenido spesífiko akí. Tur e pasonan pa reentrada di e detenido den SDKK a tuma lugá bou di supervishon di e médiko di nos instituto.

Pa medio di esaki Gerensia ta konfia di a informá nos komunidat debidamente ku SDKK ta mantené su mes na e protokòlnan establesí den kuadro di COVID-19 i ketu bai ta liber di e malesa akí.

Ministerio konserní