Publiká riba 19 Yüni 2019
Willemstad – Djasabra último den kuadro di e trayekto di resosialisashon SDKK a sigui ku e proyekto di fortifikashon di lasonan familiar entre e tatanan detené i nan yunan. Algun kliente a wòrdu nominá/ skohé pa a partisipá na e dia aki dediká speshal na nan.
Konhuntamente ku sektor privá i personanan individual, a selebrá for di mainta te 4’or di atardi dia di tata den tur blòk. Meskos ku e selebrashon di dia di mama na luna di mei último, e metanan a keda intakto: “pone atenshon i fortifiká e relashon entre e tatanan i nan yunan, stimulá kontakto sosial, stimulá rekreashon i desaroyo kreativo i stimulá konsentrashon i komunikashon.
Tin vários petishon, di parti di e tatanan detené den SDKK, pa bini ku mas di e tipo di proyektonan aki ku ta involukrá famia di e klientenan.
SDKK, a base di e maneho di Minister di Hustisia, sr. Girigorie, ke guia e prosesonan pa ku fortifikashon di e lasonan familiar entre esnan detené i nan famianan.
Ta keda sumamente importante pa stimulá i enkurashá mayornan, den e kaso aki tatanan, detené den SDKK, pa nan keda ku nan ròl di edukadó durante di nan periodo di detenshon. Nos sa ku esaki a demostrá su mes ku esaki tin un impakto i influensia positivo riba e desaroyo di nan yunan riba tur nivel. Pa por guia e proseso di resosialisashon di e tatanan detené mester enfoká riba integrashon di e famia den e resosialisashon, traha konsientemente riba e relashon entre tata i yu(nan), purba na huntu yega na posibel dianan di famia kaminda e parti di e dia ku ta esun sosial i di rekreo ta wòrdu stimulá i para ketu na importansia di un tata den bida di yunan.Djasabra e yunan a wòrdu tres’e SDKK i bou di guia di entre otro e guiado di aktividatnan, a hiba e yunan den un sala kaminda bou di guia di e trahadónan sosial di SDKK, e tatanan por a sinta na mesa i pinta, fèrf, papia, i demostrá amor na nan yu(nan). Mester bisa ku e tatanan ku a partisipá e parti di mainta ta trata di ta tatanan ku tin kastigu bida largu pa sinta, tatanan ku tin 22 aña òf mas di kastigu pa sinta i tatanan ku no tin problema pa ta den un espasio ku otro tatanan.
Tabata emoshonal pa a mira kon e tatanan tabata sinta warda nan yunan yega na e sala kaminda nan a reuní i alabes kon e yunan na nan yegada, a kore bai brasa nan tatanan. Na final di e promé parti di dia aki e tatanan a keda hopi kontentu i agradesido pa e echo ku a duna nan e oportunidat aki.
E di dos parti di dia no tabata tin mucha aserka. Akinan a añadí 18 tata mas (ku tambe tin un komportashon ehemplar den SDKK), i nan tambe a haña e chèns pa pasa un par di ora kontentu i skucha over di e importansia di e ròl di un tata pa su yunan.
Mas i mas SDKK ta desaroyá bai den e direkshon kaminda den e kaso aki e tatanan detené nan petishon i nesesidat (realístiko) a i ta wòrdu skuchá i ehekutá konhuntamente.
