SDKK ta para ketu na víktimanan riba Dia Internashonal kontra Violensia - Informashon tokante Gobièrnu di Kòrsou Bo opinion

Notisia

SDKK ta para ketu na víktimanan riba Dia Internashonal kontra Violensia

Geplaatst op 24 November 2020 dor di Ministerio Hustisia

WILLEMSTAD— Den kuadro di resosialisashon e aña aki Sentro di Detenshon i Korekshon Kòrsou a skohe pa  pone atenshon na víktimanan di delitonan. E motibu ta pa dirigí mas atenshon en general na ampliashon di responsabilidat den pensamentu i aktitut di nos klientenan. Primordial na esun di nos hóbennan ku ta detené. Ampliashon di e konsientisashon moral ta un elemento importante den trayektonan di resosialisashon.

E último añanan e atenshon pa víktimanan di kriminalidat a subi hopi.  E víktima tabatin pa hopi aña un posishon marginá durante, promé i despues di huisio.

Sra. Malvina Cecilia, e hefe di e Unidat di Korekshon, ta splika ku ta lógiko ku SDKK tambe ta habrí pa hiba e diskushon ku nos klientenan pa loke ta trata e responsabilidat i tareanan di SDKK na momentu ku ta trata víktimanan. Es mas tin diferente metódiko, ku ya a demostrá nan mes mundialmente, manera entre otro ‘víktima den spòtlait, terapia di famia i hustisia restorativo, ku ta  pone atenshon i asina fortifiká e posishon di víktimanan.

Pa e kliente por komprondé ku e posishon di e víktima promé, durante i na final di e huisio ta konta i ta importante pa e kliente sa unda e mes ta pará. E echo ku un kliente ta wòrdu kondená ta paso e a faya ku nos leinan vigente i a tacha e derechi di e víktima.

Den interkambio ku e klientenan, hopi di nan bisa i ta haña ku nan mes, tambe ta víktima. Sigur ora nan konta kon nan bida a kana te na momentu di e delito, detenshon i sentensia. Ámbos tin derechinan ku mester wòrdu respetá. Derechinan di víktimanan no opstante ta kondusí na tacha derechinan di e kliente i vise vèrsa. Den sierto situashonnan ta bon kla ken ta víktima i ken ta kliente. Tin kasonan kaminda e víktima mes ta e kliente òf e kliente den pasado mes tabata víktima. E nuansa aki no tin mag di kondusí ku un hende, den kua forma ku ta, ta wòrdu perhudiká a konsekuensia di un komportashon kastigabel di un otro hende.

SDKK ta haña importante, den kuadro di resosialisashon, pa nos klientenan ta konsiente di un par di kos. Unu: rekonosé ku semper ora ku kometé un delito, tin víktima(nan). Ku un víktima tin un posishon fuerte den nos leinan. Ku un víktima ta haña protekshon kaminda ta nesesario. Ku si un víktima mester di sosten e ta haña esaki pa bin bei i pasa over di e konsekuensianan di e delito. I por último, ku un víktima méster tin posibilidatnan pa rekuperá di e konsekuensianan (finansiero, práktiko i emoshonal). Por ehèmpel na momentu di verlòf pafó di e instituto e presensia di e víktima i/òf sobrebibiente ta un punto di atenshon importante.

Finalmente sra. Cecilia ta enfatisá ku resosialisashon semper mester ta dirigí den e forma, kaminda ku ta hasi e kliente konsiente di su manera di pensa i aktua, i asina ta minimalisá e chèns ku e kliente ta krea víktima(nan) di nobo den futuro i/òf e chèns aki ta bira mas chikí ku ta posibel.

Ministerio konserní