Notisia

Willemstad – Resientemente un grupo di personal di SDKK a inisiá e tayer pa bira un potensial fasilitando un intervenshon sientífiko, pa asina, na Kòrsou konhuntamente, yuda kibra sírkulonan eksistente di violensia bou di hubentut. E tayer aki a wòrdu duná dor di sra. Profesor Yvonne Sliep. Sra. Sliep ta afiliá na e Universidat di KwaZulu-Natal na Sur Afrika i alabes e ta direktor di e Fundashon Narativo internashonal. Sra. Sliep a yega di traha na mas ku 20 pais tradusiendo e siensia den intervenshonnan riba un nivel nashonal i aksesibel pa komunidatnan. Sra. Sliep a traha hopi ekstenso ku investigashon narativo, terapia narativo i ta un fasilitado eksperto den tayernan teatral narativo. 

E posibilidat pa partisipá na e tayer aki a wòrdu fasilitá pa medio di e kolaborashon ekstenso inter ministerial di Hustisia i di Desaroyo Sosial, Labor i Bienestar. Minister Girigorie i  Minister Koeiman konforme nan maneho i komo tata, nan tur dos sa ku na Kòrsou tambe nos hóbennan, sigur esnan ku a kai for di e sistema edukashonal, tin diferente reto.  

Krese den situashonnan violento den komunidat, ku no ta tur ora por yuda akapará e tipo di situashonnan aki, e hóbennan ku na e momentu ei ta den desaroyo pa bira adulto, ta pasa dor di momentunan sumamente difísil.  

Realidat ta ku hopi mayor, òf esnan ku ta responsabel pa e edukashon di e hóbennan aki, ta traha i/òf biba nan mes, bou di hopi strès, falta di material i tin ora asta fondonan nesesario. Na momentu ku un hóben wòrdu eksponé na un periodo muchu largu na strès, esaki por afektá e hóben físikamente i sikológiko. Investigashonnan a demostrá ku ora un ser humano wòrdu eksponé un periodo largu na violensia, esaki por kondusí na komportashon violento segun nan ta desaroyá pa/i ora nan bira adulto, ku por ehèmpel por ta forma parti di un gèng, ‘bully’ na skol i violensia doméstiko. Mucha- i hóbennan tambe ta kai den e sirkulo visioso di komportashon antisosial i komportashon di riesgo, manera por ehèmpel mal uso di supstansianan (no) prohibí. 

Meta di e kurso aki den su totalidat ta pa e personal di SDKK yuda desaroyá un bos serka e hóbennan den detenshon pa nan siña un manera mas apropiá pa dil ku situashonnan fèrfelu den bida. E intervenshon aki ta duna posibilidat pa partisipá durante di un periodo di un aña na diferente tayer basa riba e modèl di kritiká refleksivo. Esaki ta nifiká: promé ku bo mustra dede riba un otro hende su fayonan , wak pa abo ta un hende ehemplar ku otronan por siña di dje. E proseso ku e trahadónan di SDKK lo bai pasa dor di dje e aña benidero ta duna nan un base teorétiko sólido i alabes siña a base di eksperensiá dor di hasi hopi ehersisionan den un tim dirigí riba problemanan eksistente. Asina e trahadónan lo bai siña kon pa yuda dirigí i yuda e hóbennan guia nan bida dor di diferente retonan durante di nan detenshon usando métodonan positivo i sano. E liña kòrá den e guia ku e trahadónan lo bai hasi uso di dje ta pa duna e hóbennan e espasio pa papia, reflehá huntu riba kada un su eksperensia, sostené otro sikológiko i stimulá komportashon pro sosial pa hasi SDKK un instituto ‘safe’ kaminda hóbennan ta sinti nan mes konfortabel pa papia i ekspresá nan mes sin miedu. Eksperensia den e 20 paisnan kaminda e metódiko i intervenshon aki a wòrdu usa a demostrá ku esaki ta resultá den un efektonan kumulativo. Es desir: sintimentu bo bon, un outo estima positivo i kibramentu di sírkulonan di violensia den komunidat. Pueblo di Kòrsou no ke keda atras den e desaroyo aki, ya ku nos hóbennan den SDKK tambe ta forma parti di nos futuro potensial generashonnan. Tim di Maneho di SDKK ta yama un danki di kurason na Minister Hensley Koeiman i su ministerio ku a duna e oportunidat úniko aki na trahadónan di SDKK.