Publiká riba 08 Yanüari 2020
Willemstad- Minister di Enseñansa, Siensia, Kultura i Deporte (ESKD) sra. Marilyn Alcalá-Wallé ta gradisí tur mayor i studiantenan pa e asistensia masal na e promé anochi di informashon general pa hóbennan ku tin idea di bai sigui nan estudio den eksterior, prinsipalmente esnan ku ta bai studia na Hulanda próksimamente. Durante e promé anochi a duna informashon básiko i general na mayornan i studiantenan. Den e siguiente seshon ku ta djaweps 9 yanüari 2020 ta bai duna mas detaye pa mayornan i studiantenan pa ta mas mihor prepará ora ku e yunan ta bai sigui studia na Hulanda.Tumando nota ku ta sumamente importante pa ora hóbennan ta bai studia den eksterior, i sigur na Hulanda, nan ta mas mihó posibel prepará posibel, gobièrnu di su banda ta bai duna e siguiente seshon ku informashon mas konkreto. Esaki ta resultado di palabrashonnan hasí den e ‘Vierlandenoverleg’ entre Ministernan den 2019, kaminda kada pais den Reino ta bai duna mas atenshon na e parti di guia i di preparashon na e studiantenan nobo ku ta bai kontinuá nan estudio na Hulanda pa alsa e nivel di éksito pa nos studiantenan.
E siguiente seshon kargá ku informashon importante pa tur studiante 2020/2021 ku ta bai studia na Hulanda i pa nan mayornan, sea nan ta bai via di Stichting Studiefinanciering Curaçao (SSC) o nan ta bai independientemente ( “freemovers”) djaweps 9 di yanüari 2020 na WTC, Piscadera i ta di 7:00 – 9:00 or pm.
Durante di e siguiente seshon ta bai duna mayornan i nan yunan sosten den diferente area, manera e preparashon pa eskoho di estudio, e fondonan pa finansiamentu di estudio, e seguro, bolsa di estudio i repartishon, diferente link riba internet ku ta importante pa e hóben ta na altura di dj’é i ku por yud’é prepará su mes mas mihó i mas informashon tokante di e proseso di Sosten pa Guia Edukashonal(SIGE) te na momento ku e hóbennan bai Hulanda.
Tur mayor i studiante ta bonbiní.
Entrada ta gratis.
—
KOMUNIKASHON
