Publiká riba 14 Aprel 2025
Willemstad – Después di e desgrasia trágiko na Repúblika Dominikana, kaminda un dak di un edifisio a basha den otro resientemente, preokupashon mundial a surgi tokante e seguridat di edifisionan. Tambe na Kòrsou, e insidente aki a lanta preguntanan tokante kiko nos por hasi pa sigui konstruí na un manera seif i sostené nos forma biba i traha ku ta sigur pa tur hende. Ministerio di Tráfiko, Transporte i Planifikashon Urbano ta ekspresá su simpatia ku viktimanan i nan famia.
Ounke no ta konosí ainda kiko eksaktamente a kousa e desgrasia na Repúblika Dominikana – e investigashon ta sigui – e insidente aki ta pone nos atenshon riba kon importante seguridat ta.
Tur suidadano, doño òf usuario di un propiedat – si ta un kas òf un edifisio pa negoshi – tin su responsabilidat pa seguridat di e lugá. Bon mantenshon, inspekshon regular i traha segun normanan legal i tékniko ta elementonan esensial pa evitá riesgo innesesario.
Serivisio pa Planifikashon di Urbano (ROP) ta disponibel pa yuda ku konseho, i guia tokante kon por traha òf mantené un edifisio den manera sigur. Huntu nos por kontribuí na un forma di biba seif i konstruí mas sigur pa tur habitante di Kòrsou.
Pa mas informashon òf pa pidi konseho, por tuma kontakto ku ROP.
