Bo opinion

Notisia

Sehos su Plan di Kalamidat a drenta na vigor

Geplaatst op 29 April 2019 dor di Ministerio Salubridat Públiko, Medio Ambiente i Naturalesa

Komunikado di Prensa relashoná ku e hecho ku koriente a kai afó na SEHOS     
Sehos su Plan di Kalamidat a drenta na vigor 

Willemstad – Awe mardugá koriente a kai afó den parti di Otrobanda i Rif. Esaki tabatin komo konsekuensia ku koriente a kai afó na hòspital SEHOS, loke no ta usual ya ku Aqualectra ta duna semper preferensia na SEHOS komo ku e ta un hòspital. E Plan di Kalamidat di SEHOS a keda aktivá rápidamente pa e Tim di Kalamidat i tur e departamentunan krusial, esta Sala di Operashon, Intensive Care Unit, Unidat Neonatal (pa bebinan den couveuse) i EHBO a funshoná por medio di e sistema di backup di SEHOS.   

Ròl di Sehos

Na promé lugá ta SEHOS ta responsabel pa e hospital i ehekushon di su Plan di Kalamidat.

Minister di Salú for di trempan a tuma kontakto ku direktor di hòspital, sr. Casperson, i tambe direktor finansiero, sr. Thodé, ku ámbos a splika minister detayadamente e pasonan ku a keda tumá dor di SEHOS. Segun e informashon risibí, e backup di SEHOS dirihí riba e sistema- i aparatonan krítiko, ku e meta pa keda garantisá e seguridat di kuido di e pashènt, a funshoná debidamente. SEHOS ta mantené i tèstnan regularmente. Esaki no ta solamente e generatornan, pero tambe e sistema di UPS i bateria etc. Tur e 7 miembronan di Tim di Kalamidat  a asumí nan responsabilidat i nan a aktivá 13 kolega mas di kuido i technische dienst pa yuda nan. Tambe segun SEHOS, e kontaktonan interno entre di e Tim di Kalamidat i tur e departamentunan a tuma lugá, meskos vigilansia mas aktivo di pashèntnan. Tur personal konserní a aktuá segun e relato debidamente. Kemen, segun SEHOS e hendenan, ekipo- i proseduranan a kana konformé e Plan di Kalamidat.

Ròl di Ministerio di GMN i Inspekshon di Salú

Pa loke ta Ministerio di Salubridat, Naturalesa i Medio Ambiente, Inspekshon di Salú ta e instituto responsabel pa kòntròl independiente di kalidat i funshonamentu di tur hòspital (esta SEHOS, Advent i Capriles) i ta hasi su investigashonnan independiente. Kemen lòs di e splikashon di SEHOS manera formulá aki’riba, Inspekshon di Salú ta kontrolá si bèrdat e sistema di kalamidat a funshoná spesífikamente den e kaso akí. Minister a enkargá Inspekshon ku e investigashon i mester bisa ku Inspektor mes tambe a tuma inisiativa pa hasi investigashon di e suseso.

Ròl di Aqualectra

Minister di Salubridat, Naturalesa i Medio Ambiente a tuma kontakto ku direktor di Aqualectra, sr. Jonis, ku tambe a duna un splikashon amplio ku un kabel di transmishon di 30KV entre Aqualectra Mundu Nobo i substation Parasasa a kai afó.

Minister a pidi SEHOS, Inspekshon i Aqualectra pa duna un splikashon amplio na pueblo di kada ken su responsabilidat, lokual a sosodé durante dia. Por último Minister ta lamentá e hecho ku pashènt, famianan i pueblo en general a pasa momentunan di tenshon.

                                                            
                                                                        ###

 

Ministerio konserní