Publiká riba 13 Ougùstùs 2024
Willemstad – E sekretario di estado nobo pa relashonnan den reino, Señor Zsolt Szabó, e siman aki ta di bishita di trabou na Aruba, Boneiru i Kòrsou. Despues di a bishita Aruba, awe a toka turno pa un bishita na Kòrsou. Sekretario di Estado Szabó a kuminsá su bishita na Kòrsou ku un bishita di kortesia serka Su Ekselensia Sra. Lucille George-Wout, Gobernador di Kòrsou.
Seguidamente e Sekretario di Estado a topa ku Promé Minister Gilmar Pisas. Durante e reunion ku Promé Minister Pisas i su konseheronan, e dos mandatarionan a interkambiá riba diferente tema di interes komun pa e relashonnan den reino, manera e implementashon di e pakete di pais. Tambe a para ketu riba diferente desaroyonan di importansia den nos komunidat manera resolushon di Ennia i CMC i e impakto riba presupuesto di Gobièrnu.
Finalmente e Sekretario di Estado a indiká na Promé Minister ku e temanan sentral pa e gobièrnu nobo na Hulanda pa ku relashonnan den reino lo ta bon gobernashon, un maneho finansiero sólido i outosufisiensia (esta e kapasidat di e islanan pa kubri nan nesesidatnan). Den e lunanan benidero, Promé Minister Pisas lo sigui e kombersashon ku e Sekretario di Estado nobo riba e temanan aki.
