Publiká riba 09 Aprel 2025
WILLEMSTAD – Dia 9 di aprel 2025, sr. Zlost Szabó, Sekretario di Estado enkargá ku Relashonnan den Reino i Digitalisashon, a hasi un bishita di trabou pasando serka Konseho di Ministernan. Na promé instante Sr. Szabó a felisitá Sr. Pisas pa e viktoria durante e elekshon parlamentario di dia 21 mart 2025.
Sr. Pisas a aseptá felisitashon i a bai den detaye splikando Sr. Szabó kiko tabata e éksito durante di e elekshon. Esei sigur ta e efekto di merkadeo kaminda a presentá e trabounan ku a keda realisá i tambe a reflehá riba éksitonan ku a logra den e sektor di salubridat. Mas aleu sr. Pisas a enfatisá ku apesar di a gana ku un mayoria relativamente amplio, sigur lo sòru pa goberná di un forma demokrátiko i a elaborá kon lo e hasi esaki tambe.
Seguidamente a trata tambe e tema di e Kadena di balor pa produkshon i distribushon di hidrógeno bèrdè. E tema akí sigur riba un término largu ta di balor pa Gobièrnu di Kòrsou, pero e realidat ta ku e ta keda un proyekto kostoso i den e periodo benidero mester wak kon ta bai sigui, mirando ku gobièrnunan ta trata di pone fondo disponibel. Esaki ta keda un reto i a korto plaso gobièrnu mester disidí kon pa resolvé e situashon akí. Lo sigui elaborá riba e tema akí tambe aki 2 siman ku minister Dirk Beljaarts, kual ta Minister di Asuntunan Ekonómiko di Hulanda.
Di ámbos banda a elaborá riba puntonan ku ta kai bou di geopolítika i a papia kon tur e paisnan den Reino Hulandes lo mester komuniká ku otro i buska pa wak kiko e impakto ta pa kada un di nos. Sr. Szabó a indiká ku e Minister di Relashonnan den Reino ta dispuesto pa yuda nos aparato públiko ku informashon kaminda esei ta nesesario.
Durante di e enkuentro a papia tambe di e Pakete Pais kual ta kaduká na 2027. Di ámbos banda a mustra interes pa, apesar ku e Pakete Pais terminá, tòg lo por bai evaluá te kon leu por sigui traha huntu pa temanan ku ta andando i ku lo ta di balor agregá pa sigui traha huntu riba dje.
Pa konkluí, a hasi palabrashonnan inisial kon ta bai atendé ku fiansanan di pais ku durante di e aña akí ta bini na remarke, kual mester kuminsá paga bèk loke a wòrdu fiá. Tin palabrashon pa hasi e ehersisionan nesesario i riba término kòrtiku lo bai den deliberashon na mesa na nivel di ámtenar primeramente.
