Publiká riba 04 Desèmber 2017
Willemstad – For di 14 di desèmber próksimo te ku 2 di yanuari 2018, e departamentu di PEL (Personnel Licensing) pa motibunan atministrativo ta sera pa públiko. Esaki ta nifiká ku te ku dia 13 di desèmber tin e oportunidat pa atkirí lisensia of hasi uso di e servisionan di e departamentu menshoná.
CCAA ta pidi tur hende ku tin ku pasa nan eksamen i òf tin ku atende kualke asuntu di lisensia di piloto, kontròl aéro i mekániko di avion, pa bin hasi esaki promé ku dia 14 di desèmber próksimo.
E sekshon di PEL (Personnel Licensing) ta responsabel pa entrega i atministrashon di lisensia na esnan ku mester haña lisensia pa sierto responsabilidatnan spesífiko manera piloto, kontròl aéreo i mekániko. Alabes e sekshon di PEL ta outorisá i ekipá pa duna eksamen di piloto, kontròl aéro i tambe mekániko di avion.
Outoridat di Aviashon Sivil ta diskulpá su mes pa eventual inkombeniensha ku esaki por trese i ta rekordá ku por pasa te ku dia 13 di desèmber. Su orarionan ta di djaluna pa djabièrnè di 8or di mainta pa 12or di mèrdia i di 13:30 te ku 4:30 di atardi na Kaya Afido z/n, Mahuma. Pa kualke informashon adishonal semper por tuma kontakto via +5999-839 3319 of civilair@gobiernu.cw
Na nòmber di Minister di Tráfiko, Transporte i Planifikashon Urbano, CCAA ta desea tur hende, spesialmente esnan ku ta laborá den aviashon, felis dianan di fiesta i un bon aña nobo.
