Publiká riba 17 Ougùstùs 2018
Willemstad – Den transkurso di e último 9 simannan mayornan ku ta bini na remarke pa un kas di FKP, a sigui e kurso di Programa Pedagógiko Positivo (Triple P) ouspisiá pa sektor Famia i Hubentut di Ministerio Desaroyo Sosial, Labor i Bienestar (SOAW).
Durante e simannan aki e mayornan a ser reforsá efektivamente den nan tarea di edukashon i den nan abilidatnan di eduká. E Programa Pedagógiko Positivo ta yuda pa revení problemanan emoshonal i di mal komportashon serka mucha, dor di hasi e mayor mas kompetente i ábil.
Durante e kurso mayornan a trein ku strategianan di edukashon positivo i asina nan a siña kon atendé ku nan yunan na un manera positivo. E mayornan a haña mas abilidat komo edukadó pa por krea un bon laso ku nan yu(nan). Mayornan a ekspresá nan gratitut di por a sigui e programa aki, spesialmente e seshonnan individual.
Pabien na kada un di e 11 mayornan ku a kaba e Programa di Triple P ku éksito. SOAW ta deseá tur e mayornan éksito den ehekushon di e Programa di Triple P den nan kas i bario nobo.
Riba e kombinashon di foto por apresiá e momento kaminda e mayornan a risibí nan sertifikado serka e fasilitadónan di Triple P di sektor Famia i Hubentut di SOAW.
