Sektor Farandulero tin atenshon di Ministerio di Enseñansa, Siensia, Kultura i Deporte - Informashon tokante Gobièrnu di Kòrsou Bo opinion

Notisia

Sektor Farandulero tin atenshon di Ministerio di Enseñansa, Siensia, Kultura i Deporte

Geplaatst op 27 February 2021 dor di Ministerio Enseñansa, Siensia, Kultura & Deporte

WILLEMSTAD – E sektor farandulero ta un di e sektornan ku a keda mas perhudiká durante di e pandemia di Corona ku nos pais ta pasando aden. Pa e motibu akí Minister Steven Croes resien a tene algun seshon kaminda a dialogá ku vários persona ku ta den e situashon difísil akí. Minister a keda asesorá pa Sra. Stella van Rijn kende ta e Sekretario-General di Ministerio di Asuntunan General i ku alabes ta representá e tim di Krísis/Kalamidat, sra. Lisette Sambo-Velder, Direktor di Sektor di Kultura i Deporte i su kolaboradónan di gabinete. Durante di e seshon huntu ku representantenan a yega na palabrashonnan konkreto pa ku e sektor farandulero.

 Den siman anterior Minister Croes a sinta primeramente ku Asosashon di Músiko i Artista Kòrsou (AMAK) ku a lanta un Komishon na Interes di Farándula (KIF) i den fin di siman tras di lomba Minister a sinta ku representashon di organisadónan i promotornan di diferente evenemento di diferente gremio i género musikal i tambe representashon di e gremio di komedia. Durante e promé seshon AMAK a hasi entrega di proposishonnan pa un posibel protokòl pa habri farándula di Kòrsou bèk. Durante di e seshonnan Minister Croes a spliká ku e ta komprondé loke e sektor di farandula ta pasando aden i huntu ku e tim di Sektor di Kultura i Deporte ke yega na proposishonan konkreto huntu ku e representantenan pa yega na un solushon. Minister a hasi un petishon na tur e representantenan pa bin ku posibel aktividatnan, kaminda por habri farandula bèk di un forma ku ta kuadra ku e medidanan ku Gobièrnu ta implementá. Sra. Van Rijn a splika kon e situashon ta aktualmente i a pidi e sektor pa bini ku alternativanan kaminda nos lo por bai habri e sektor bèk paulatinamente. E aktividatnan ta keda ehekutá komo ‘try out activities’, riba dianan di konmemorashon i selebrashonnan nashonal.

 E representantenan a trese vários punto ku ta di gran balor i a yega na palabrashonnan konkreto. For di e grupo di representante nan a skohe un persona pa bira e persona di kontakto ku ta sigui dialogá ku e timnan. Tambe a keda palabrá ku e grupo di representantenan ta bin ku proposishon pa aktividatnan i maneranan kon pa habri e sektor akí bèk. Na mes momentu e representantenan a proponé na Minister Croes pa papia ku Konseho di Minister pa bin ku insentivanan fiskal kaminda ta trese posibel eksonerashon pa e negoshantenan di e sektor farandulero. Tambe nan a bin ku un proposishon na Minister pa Gobièrnu bin ku un kampaña mas agresivo pa poblashon bakuna komo ku esaki por yuda e sektor habri bèk mas fásil. Pasó na momentu ku 70% di nos pais bakuná nos por yega na e imunidat kolektivo. E kampaña ta pa huntu ku ‘influencers’ nan di e sektor bakuná i asina nos por stimulá e komunidat pa bakuná. Di e forma akí nos por kuminsá tin nos konsierto, komedia, aktividatnan kultural i demas mas pronto posibel.

 E reunion a kana di un forma organisá i tur hende a sali bèk kontentu i satisfecho. Ta e intenshon pa reuní bèk dia 13 mart of promé pa yega na aktividatnan konkreto ku por tuma lugá pronto. Minister Croes a keda sumamente satisfecho i a indiká ku el lo sigui kana riba e trayekto akí pa yega na un solushon mas pronto ku ta posibel.

** riba e potrètnan athunto por tuma nota di un di e seshonnan.

Ministerio konserní