Sektor turístiko ta prepará pa atendé ku Corona Virus - Informashon tokante Gobièrnu di Kòrsou Bo opinion

Notisia

Sektor turístiko ta prepará pa atendé ku Corona Virus

Geplaatst op 01 March 2020 dor di Ministerio Desaroyo Ekonómiko

WILLEMSTAD- Den su tarea komo minister di Desaroyo Ekonómiko, sra. Giselle Mc William a reuní resientemente ku partnernan den sektor turístiko pa asina papia tokante preparashon i plannan di akshon ku e sektor tin pa por atendé ku e posibilidatnan di Corona Virus den futuro. Komo minister enkargá ku e kartera di turismo, Sra. Mc William a sinta ku tantu Ofisina di Turismo di Kòrsou komo Curaçao Hospitality & Tourism Associattion (CHATA) kendenan ámbos ta partnernan krusial den e sektor asina importante pa ekonomia di nos pais.

 Minister Mc William ta enfatisá ku sektor turístiko mester ta prepará di un forma proaktivo i mester ta riba un liña pa loke ta trata komunikashon lokal pero tambe internashonal. Sektor turístiko lokal ya ta hañando diferente pregunta di turistanan tokante e situashon na Kòrsou i den nos region òf tokante pasonan di seguridat ku nos ta tumando relashoná ku e pandemia aki.

Komokiera ta di sumo importansia pa e sektor ta prepará pa por atendé debidamente ku e vírùs na momentu ku nos keda konfrontá ku esaki. For di kuminsamentu di febrüari di e aña aki, e partnernan den turismo ya a reuní ku Airport i Ministerio di Salubridat pa deliniá un strategia di komunikashon ofishal ku mester tuma lugá pero tambe pa kuminsá manda informashon afó i hasi propaganda en general di pasonan di seguridat ku tur hende mester tuma.

E plan di akshon no ta pone atenshon solamente riba e mas ku 1 mion di turista di estadia i krusero ku Kòrsou sa tin pa aña, pero ta para ketu tambe riba e personal di kada akomodashon, servisio òf atrakshon turístiko ku turista lo bai drenta den kontakto kuné. A kuminsá alsa e sistema higiéniko pero tambe duna training na personal kon pa aktua den kaso ku konstatá ku tin hende malu ku posiblemente ta afektá ku e vírùs di COVID-19. E plan ta, pa kontinuá i insentivá e training aki na promé instansia pa tur e miembronan di CHATA  pa despues kontinuá pa tur demas akomodashonnan den e sektor. Den Minister su bista esaki ta imperativo pa tuma lugá i no ta un opshon.

Den transkurso di e simannan benidero Minister Mc William lo sigui sinta riba base regular ku tur otro partner den e sektor di Turismo tambe manera entre otro Curaçao Aiport Partners (CAP), Curaçao Aiport Holding (CAH), Curaçao Port Authority (CPA) huntu ku Ministerio di Salubridat i e tim di Kalamidat pa di un forma integral sigui monitoreá i analisá e situashon i alabes tuma pasonan konkreto pa tur hende sea ku nan ta biba akinan i traha den sektor di Turismo òf ta di bishita komo turista ta protehá.

 

Ministerio konserní