Notisia

WILLEMSTAD. Riba dia Internashonal di matemátika, Ministerio di Enseñansa, Siensia, Kultura i Deporte (ESKD) a pone atenshon na e dia ku aktividatnan na vários skol den e luna akí. Djaluna 14 di mart último, a selebrá Dia Internashonal di Matemátika ku bishita na Skol di Fundeshi  Emmy Berthold ku Minister remplasante di Enseñansa, Siensia, Kultura i Deporte sra. Dorothy Pietersz-Janga, UNESCO Curaçao i Fundashon Tur Ta Konta (FTTK) durante un mainta ameno kaminda Fiesta di Matemátika a tuma lugá.

Durante di e bishita na skol di Fundeshi Emmy Berthold, e alumnonan a demostrá nan abilidatnan den aritmétika i matemátika, maestronan a komponé i areglá un “rekenlied” na hulandes ku e kor di skol a presentá riba e mainta eksitoso akí. FTTK a komprometé, ku lo laga graba e ‘rekenlied’ den studio pa asina esaki bira e kantika di dia Internashonal di Matemátika.

Manera ta ampliamente konosí, e dominio di matemátika ta yuda desaroyá di pensamentu krítiko i lógiko serka muchanan i mehorá abilidat di hende pa solushoná problema. Banda di esaki, e ta sostené realisashon di e Metanan pa Desaroyo Duradero di Nashonnan Uní i partikularmente e meta number 4 ku ta para pa Edukashon di Kalidat, SDG4.

Segun kabes di skol sra. Suzie Davelaar-Efraci, matemátika i aritmétika ta forma parti di nos bida diario. Tambe, sra. Davelaar-Efraci a kompartí, ku su soño ta pa FTTK por organisá un konferensia di matemátika i kalkulashon ku eksperto i profesornan, kaminda tur maestro di fundeshi i dosentenan di aritmétika di skolnan avansá aki na Kòrsou ta partisipá. FTTK a komprometé nan mes pa bai traha riba e soño aki komo un proyekto. Minister Pietersz-Janga tambe a duna un diskurso den kua el a para ketu na e importansia di hasi matemátika agradabel pa mucha por siña esaki for di un edat yòn pa asina kita e miedu serka e mucha. Presidente di FTTK, sr. Etienne Ijs, tambe a hiba palabra i a para ketu riba e tema i matemátika na skol i den bida di kada mucha.

Komo gesto, na skolnan di Fundeshi J.W.Th. Schotborgh, Kolegio San Dominico i Emmy Berthold a risibí e buki Kòrsou Limpi Doeboek publiká pa GreenKidz for di man di Minister Pietersz-Janga. E buki akí, ta bin di e Programa di Hende i Biosfera i UNESCO Curaçao i e bukinan a keda atkerí pa regalá e skolnan pa uzo den nan biblioteka.

E Fiesta di Matemátika ta sigui durante henter luna di mart i bishitanan ta sigui na skolnan partisipante pa sigui stimulá aritmétika i matemátika bou di alumnonan na Kòrsou.

**Riba fotonan por tuma nota di Minister D. Pietersz-Janga i presidente di Fundashon Tur Ta Konta sr. Etttienne Ijs. Pa mas potrèt por bishitá: Relato Fotográfiko Fiesta di Matemátika

MAS NOTISIA

Ministerio konserní: Enseñansa, Siensia, Kultura & Deporte