Publiká riba 02 Sèptèmber 2021
Willemstad – Djamars último Minister di Salubridat, Medio Ambiente i Naturalesa dr. Dorothy Pietersz- Janga i señora Sharo Bikker di e organisashon “World Cleanup Day Curaçao” a anunsiá ofisialmente ku luna di sèptèmber aki ta luna di limpiesa i ku “Curaçao Cleanup Day 2021” e aña aki ta tuma lugá dia 18 di sèptèmber. Riba e dia aki un total di 180 pais rònt mundu lo organisá aktividatnan di konsientisashon i limpiesa di pais. Ministerio di GMN ya pa 4 aña kaba ta sostené e proyekto aki pa konsientisá komunidat di e importansia pa tene Kòrsou limpi.
Minister di GMN dr. Dorothy Pietersz- Janga a mustra ku apesar ku Kòrsou ta un pais ku bunita naturalesa, ainda tin siudadanonan ku ta susha nos pais i esaki ta hasi hopi doló. Nos mester stòp di tira sushi riba kaya, den laman i nos mondinan i hasi mas uzo di e puntonan ku ta kolektá pa resiklahe. Minister a hasi un yamada tambe na komunidat pa partisipá na e akshon di limpiesa i forma parti di algu grandi, limpia nos bunita isla Kòrsou i tene esaki limpi.
Señora Bikker a splika ku World Cleanup Day a bira un kustumber kaba di tur aña den sèptèmber, pero no e luna aki so, ta henter aña komunidat mester ta di fokus pa tene nos isla limpi. Señora Bikker a gradisí tambe Minister di GMN i direktor di sektor di medio ambiente señor Gabriel Murray pa e sosten i ta spera ku por sigui koperá ku otro den futuro. Finalmente Minister Pietersz- Janga i Stichting Curaçao Cleanup ta hasi un yamada na un i tur, skolnan i demas organisashonnan pa inskribí riba e website www.worldcleanupdaycuracao.org pa partisipá komo boluntario n’e proyekto aki.
###
