Publiká riba 21 Febrüari 2019
Willemstad – Gobièrnu di Kòrsou a tuma nota di e desishon unilateral di Gobièrnu venezolano pa sera fronteranan pa Aruba, Kòrsou i Boneiru dia 20 di febrüari 2019. Venezuela a sera e fronteranan pa motibu di e ayudo humanitario ku organisashonnan di ayudo internashonal a bin ta plania atraves di Kòrsou, ku a pone su mes disponibel pa fungi komo sentro logístiko pa almasenimento i tránsito di produktonan di ousilio. Komunikashon ofisial tokante seramentu di fronteranan mes no a tuma lugá di parti di Venezuela ku gobièrnunan di Kòrsou, Aruba, ni di Hulanda pa Boneiru.
Gobièrnu di Kòrsou ta lamentá profundamente e desishon ku Gobièrnu venezolano a tuma, ya ku na tur momentu Gobièrnu di Kòrsou a duna di konosé pa medio di tur kanalnan di komunikashon ofisial, ku e ayudo humanitario ta únikamente dirihí riba yuda aliviá e situashon prekario di e pueblo venezolano. Na niun momentu lo fòrsa e ayudo aki si Venezuela no ta deseá esaki. Tambe a komuniká ekstensivamente ku ta trata aki di puramente un operashon sivil i no militar. Pa e motibu aki tambe Kòrsou – tumando un bes mas den konsiderashon e laso ekonómiko i kultural estrecho ku e tin ku e pais bisiña – lo sigui ofresé e fasilidat di por ta un hùp humanitario te na momentu ku por kuminsá distribuí e ayudo aki na Venezuela.
No opstante esaki, Gobièrnu di Kòrsou na tur momentu a tene kuenta ku tur tipo di esenario ku por surgi a base di e posishon ku Kòrsou a tuma pa fungi komo sentro logístiko. Un dje senarionan tabata netamente seramentu di frontera.
A premira entre otro ku e seramentu di fronteranan den e kaso aki no tin konsekuensia pa tráfiko marítimo, ya ku ta hasi uso di otro merkado di importashon di por ehèmpel fruta i bèrdura, kombustibel, gas etc. Pa medio di un taskforce, gobièrnu ta monitòr e situashon di aserka, di moda ku si bira nesesario lo media ku otro gobièrnunan pa yega na kanalnan nobo di importashon, evitando asina kualkier kaso di eskases. Seramentu di e fronteranan tampoko mester bira kousa di preokupashon pa turistanan ku na e momentunan aki ta bishitando nos isla.
Ya pa algun tempu kaba gobièrnu ta avisando pa no biaha pa Venezuela si no ta pa motibunan di urgensia. No opstante esaki gobièrnu a konstatá ku varios hende a biaha pa Venezuela den e último periodo. Den kaso di un situashon di emergensia (por ehèmpel pa motibu médiko) ta konsehá pasaheronan ku dado momentu keda pegá na Venezuela, pa tuma kontakto ku e embahada di Reino riba number di telefon +58212-2769300. Despues di oranan di ofisina por yama: +31 247 247 247.
Asina tin informashonnan relevante, gobièrnu lo informá pueblo tokante esaki. Gobièrnu ta konsehá pa sigui informá bo mes via di kanalnan ofisial tokante e situashon di siere di frontera di parti di Venezuela i evitá di sigui informashonnan ku no ta verídiko (asina yamá fake news).
