Notisia

Kòrsou tin sinku (5) nominado pa risibí Krus di Mérito riba 2 yüli próksimo

WILLEMSTAD – Riba e pregunta di Minister enkargá ku Kultura sr. Sithree van Heydoorn, e sinku (5) nominadonan pa Krus di Mérito a bisa “SI”, ku nan ta akseptá nan nominashon pa risibí e kondekorashon Krus di Mérito pa e aña aki.

E sektor di Kultura i Deporte ku ta forma parti integral di ministerio di Enseñansa, Siensia, Kultura i Deporte (ESKD) a organisá e seremonia di aseptashon, kaminda e nominadonan por a asistí kompañá pa famia. E resepshon a tuma lugá den presensia di Minister di ESKD sr. Sithree van Heydoorn, dignatarionan i invitadonan na Renaissance Wind Greek Resort den un ambiente inspirativo i festivo. E resepshon di aseptashon ta un parti importante den e proseso di kondekorashon di Krus di Mérito kaminda tur nominado di forma ofishal, mester akseptá nan nominashon pa keda kondekorá.

Krus di Mérito ta un rekonosimentu ofisial ku Gobièrnu ta duna na un siudadano pa trabounan eksepshonal ku e persona aki a hasi pa nos komunidat, kual a hasi un impakto positivo riba desaroyo di nos dushi Kòrsou i su abitantenan. Riba 2 di yüli, durante seremonia ofisial di Dia di Bandera riba Plasa Brion, Gobièrnu di Kòrsou ta kondekorá e nominadonan.

E Nominadonan pa risibí e Krus di Mérito pa aña 2026 ta:

• Señora Ida Antonia Maria Witteveen pa su aktonan meritorio den e área sosial komunitario:
• Señora Ludmilla North van Eps pa su aktonan meritorio den e área sosial i kuido;
• Señor Hubert Marcolino Kirindongo pa su aktonan meritorio den e área di arte;
• Señor Cedric Cornelio Dandaré pa su aktonan meritorio den e área musikal;
• Señor Franklin Eusebio Clemencia pa su aktonan meritorio den e área religioso i sosial komunitario.

Un deskripshon amplio di kada nominado pronto lo keda publiká.

Minister di ESKD sr. Sithree van Heydoorn na nòmber di Gobièrnu di Kòrsou ta yama nos sinku nominadonan pa Krus di Mérito 2026 pabien i ta gradisí kada un pa nan trabounan meritorio pa nos komunidat i na desaroyo di Kòrsou.

MAS NOTISIA

Ministerio konserní: Enseñansa, Siensia, Kultura & Deporte