Publiká riba 09 Mart 2018
Dia Internashonal di Hende Muhé, un kantidat di 35 mama hóben a risibí sertifikado di nan partisipashon na e kurso di “Home Economics” den kuadro di e Programa di Urgensia. Un total di 36 hóben a kuminsá ku e trayekto aki, ocho siman pasá i ta solamente un hóben no a finalisá e trayekto.
E kursonan a kuminsá ku hóbennan di e barionan di Barber i Montaña. Nan a sigui tres kurso kompletu i ayera por a risibí sertifikado di tur e tresnan aki, esta “Home Economics”, “Prosupuesto Familiar” i “Konfiansa Propio i Asertividat”. E hóbennan di e barionan di Otrobanda i Buena Vista a kuminsá un poko mas despues den e trayekto, pues nan lo finalisá e kursonan di “Prosupuesto Familiar” i “Konfiansa Propio i Asertividat” den e próksimo simannan.
Na final di e periodo aki, por a nota diferensia den e hóbennan su manera di mira nan mes i tambe motivashon pa sali pa dilanti. Tin di e hóbennan ya a kuminsá traha pasapalu i pan, pa di e forma ei nan por kuminsá move independientemente. Adishonalmente, e hóbennan a keda inspirá pa traha nan CV di manera ku nan por yega na solisitá pa un trabou i asina sigui independisá nan mes.
Programa di Urgensia ta un programa di akshon dirigí riba mehorashon di e situashon di biba i traha pa pueblo di Kòrsou. E programa aki aktualmente ta keda implementá den e kuater barionan ariba menshoná, esta Montaña, Buena Vista, Otrobanda i Barber. Programa di Urgensia tin un punto di bista multi disiplinario. Esei ta pone ku awor ku e hóbennan a finalisá e kursonan aki, nan lo keda bou di e guia nesesario. E kursonan aki ta e promé paso ku a tuma den e barionan aki, pero tin mas proyekto den kuadro di Programa di Urgensia.
Riba e fotonan athunto, por mira e hóbennan ku a sigui e kurso ku éksito i a risibí nan sertifikado ayera.
