Publiká riba 24 Febrüari 2022
Willemstad – Djaweps 24 di febrüari 2022, Minister di Hustisia, sr. Gilmar Pisas huntu ku hefe suplente di Servisio di Atmishon, sra. Saresca Nicolaas a hasi lansamentu ofisial di e website nobo pa Servisio di Atmishon. E website akí, ta konsistí entre otro di informashon sumamente balioso tokante produkto i servisionan di Servisio di Atmishon i tambe tokante kòntròl di nos frontera kual ta un tarea ku ta keda ehekutá pa ‘Unit Vreemdelingentoezicht & Grensbewaking’ di Kuerpo Polisial. Servisio di Atmishon a opta pa inisialmente lansa e website na Hulandes i den korto tempu lo hasi tradukshon di e kontenido tambe na Ingles, Papiamentu i Spañó. Por bishitá e website via www.immigrationcur.org.
Aparte di informashon general tokante Servisio di Atmishon i ‘Unit Vreemdelingentoezicht & Grensbewaking’, e website ta brinda tambe informashon kon pa apliká pa un pèrmit di estadia (temporal) i/òf deklarashon i tambe informashon pa turistanan ku mester apliká pa un ekstenshon turístiko. Pa kada tipo di petishon i deklarashon di Servisio di Atmishon, tin e lista di rekisitonan korespondiente riba e website, e proseso di aplikashon i tambe informashon tokante pago.
Immigrationcur.org tin tambe un espasio kaminda un persona por haña tur e paso i rekisitonan nesesario pa si akaso e ke entregá un apelashon. Aparte di tur esaki, e website di Servisio di Atmishon ta hasi e lei i manehonan ku ta keda uzá pa prosesá kada tipo di petishon aksesibel pa tur usuario. E lista di petishonnan ku a keda prosesá tambe bishitantenan por haña riba e website.
Entrega di petishon
Ku lansamentu di e website akí, Servisio di Atmishon ta hasi posibel tambe awor pa personanan por entregá petishon pa un pèrmit ‘online’. Na kada tipo di petishon riba e website, por mira un kònòpi di “aanvraag indienen”. Na momentu ku klek riba e kònòpi akí, e página pa entregá petishon ta habri. Tur dokumentu konserní pa e tipo di petishon, mester wòrdu agregá digitalmente. Tin algun kategoria ku no ta aksesibel ainda ‘online’ i mientrastantu Servisio di Atmishon ta traha pa agregá esakinan, por manda e petishonnan akí manera kustumber na intake@immigrationcur.org.
Traha sita
E website ‘immigrationcur.org’ ta brinda tambe e oportunidat pa traha bo sita ‘online’ pa tuma sea pèrmit, deklarashon, restitushon, un deklarashon di ‘definitief vertrek’ i ‘voucher’ òf depósito. Esaki ta nifiká, ku no tin mester di pidi un sita mas via di e-mail sita@immigrationcur.org. Pa kada persona ku mester risibí nan pèrmit, mester traha un sita separá. Na momentu ku e sita keda trahá, ta bai un konfirmashon di e sita na e e-mail ku a indiká ora a traha e sita. Riba dia di e sita mester presentá ku e konfirmashon di sita, sea digital òf di print.
Pa kualke pregunta, por manda esaki via di e website mes wwww.immigrationcur.org òf via di página di facebook Admission Office.
