Publiká riba 12 Desèmber 2018
Ministerio di Salú, Medio Ambiente
i Naturalesa ta partisipá ku…
Servisio di kùr pa personanan ku ta atendé ku alimento ta será te dia 7 di yanüari 2019
Willemstad – Ministerio di Salú, Medio Ambiente i Naturalesa ta partisipá ku proseso di kùr pa 2019 ta kuminsá dia 7 di yanüari. Konforme lei tur persona ku ta prepará i bendé kos di kome i kos di bebe na públiko mester tin un karchi di kùr válido di UO G&Gz (ántes GGD). Esaki ta konta pa aktividatnan di fin di aña i manera aña bòltu pa temporada di karnaval. Un petishon ta bai na personanan ku tin intenshon di bende durante temporada di karnaval 2019 pa bin registrá tempran pa nan proseso por kana bon.
E proseso pa hasi petishon pa karchi di kùr ta riba djaluna, djamars i djarason na departamentu di kùr di THZ na Asuntunan di Salubridat Públiko na Piscaderaweg 49, Mundu Nobo, di 7:30 pa 9:30 di mainta. Mester bini ku un identifikashon válido sea reibeweis, sédula òf pasport, un pasfoto resien i paga Nafl 50,00 pa persona. Mes momentu e persona ta skohé un manual den e idioma di su preferensia sea Papiamentu, Hulandes, Ingles, Spañó òf Manderin i e ta skohe un fecha pa su èksamen. Dianan di èksamen ta riba djaluna, djamars i djarason parti mainta òf mèrdia. Èksamen ta dura 25 minüt i e persona mester yega mei ora promé.
