Publiká riba 06 Febrüari 2020
Willemstad – Entrante 1 di febrüari 2020, Servisio pa Obra Públiko (OW), ta konta ku un direktor nobo den persona di Sr. Erik Maas. Sr. Maas tin amplio konosementu i eksperensia komo manager di organisashonnan grandi.
Sr. Maas lo tuma liderazgo di OW i hiba e organisashon den un rumbo nobo. Sr. Puriel, ku a fungi komo direktor interino a mantené e servisio funshonal i awor ta pasa e enkargo pa e direktor nobo.
Sr. Maas tin su maestria den Mechanical Engineering ku el a risibí na University of Technology na Eindhoven, Hulanda. Sr. Maas tin eksperensia den diferente funshon komo ‘projectmanager’ i manager den ambientenan kompliká i tékniko. Esaki manera entre otro den e sektor di telekomunikashon, gas, awa i elektrisidat. Sr. Maas ta biba i traha ya pa largu tempu na Kòrsou.
OW ta e organisashon di Gobièrnu enkargá ku entre otro mantenshon di kaminda, mantenshon di mobilario di kaya, seguridat di tráfiko pa loke ta infrastruktura, maneho di awa di riol, i hopi mas.
Minister Jesus-Leito ta satisfecho ku e logro importante aki i ta konfia ku huntu ku e organisashon sr. Maas ta traha na bienestar di pueblo di Korsou.
