Servisio pa Tráfiko i Transporte ta habri djarason 13 di mei di un forma diferente - Informashon tokante Gobièrnu di Kòrsou Bo opinion

Notisia

Servisio pa Tráfiko i Transporte ta habri djarason 13 di mei di un forma diferente

Geplaatst op 11 May 2020 dor di Ministerio Tráfiko, Transporte i Planifikashon Urbano

Willemstad – Organisashon pa Tráfiko i Transporte (UOVV) ta anunsiá ku e servisio ta habri djarason 13 di mei próksimo den un forma diferente. Ta hasi un apelashon na tur kliente pa tene kuenta ku e adaptashonnan, kual ta nesesario pa hasi e organisashon kla pa reglanan nobo den kual UOVV lo por duna servisio den e temporada aki ku mester tene kuenta ku COVID-19. 

Tambe ta adaptá e dianan aki e manera kon UOVV lo brinda servisionan, manera registrashon i transkripshon di vehíkulo, eksonerashon pa transportá hende kontra pago, eksonerashon pa glas skur is mas, na su klientenan. Petishon pa e tipo di servisionan ei lo bira digital. Ta komuniká debidamente den e dianan ku ta sigui.

Tin un number di telefon via kual por risibí mas informashon di petishon pa transporte públiko, esta 839-2143 òf 839-2147. Tur ‘intake’ pa transporte públiko ta tuma lugá telefonikamente. Ta risibí e kliente solamente pa hasi entrega di pèrmit, konforme su sita. E organisashon ta risibi yamada di telefòn entre 8:00 pa 11:00 di mainta, i 2:00 pa 4:00 di atardi.

Pa loke ta trata kùrmentu di vehíkulo, UOVV ta eksonorá tur e personanan ku nan karchi di kùr a kaduká, entre 29 mart te ku 29 mei 2020, for di e but di 30 florin èkstra ku e kliente tin ku paga na momentu ku e bin kùr. Orario di servisio pa kùr vehíkulo, entrante djarason 13 di mei, ta di 7:30 pa 11:30 di mainta i 1:30 pa 4:00 di atardi.

Tur bishita na UOVV ta bai konforme sita. UOVV ta enfatisá ku e kliente mester presentá na e orario di su sita. Si presentá 15 minüt promé mester warda trankil i si yega 15 minüt despues di e orario di sita, e kliente no ta wòrdu atendé. Pa por traha sita, entrante djaluna 11 mei por manda e-mail pa pidi un sita pa kùr via sita@gobiernu.cw. Entrante djarason 13 di mei, por yama Bentana di informashon atrobe via nan number konosí 0800-1515. Lo bai tin un ekstra liña di telefon disponibel pa traha sita pa kùr, esta 839-2073.

Ministerio konserní