Publiká riba 30 Yüni 2026
Willemstad – Servisionan di Gobièrnu di Kòrsou ta sigui e situashon na Venezuela di serka, despues ku djárason 24 di yüni e pais a keda konfontá ku 2 temblor pisá ku a kousa un estado di emergensia den e pais. Direktorado di kontròl di riesgo i Maneho pa kalamidat (DRR) ta koordiná tur esfuersonan di sosten den un manera sentral pa garantisá ku yudansa ta yega kaminda tin mas nesesidat.
For di djárason anochi tabatin un grupo di Venezolano pegá na Kòrsou, despues ku nan buelo di Madrid pa Caracas mester a baha na Kòrsou i no por a sigui biaha pa Venezuela mas. Su siguiente dia un grupo di e pasaheronan a biaha bèk pa Madrid mientras sobrá a keda Kòrsou, pendiente pa por biaha pa Venezuela. Na momento ku a bira konosí ku esnan responsabel i enkargá pa transportá e pasaheronan aki pa nan destinashon no por a kumpli, Gobièrnu di Kòrsou a kuminsá kordiná e proseso konhunto ku e.o. Rode Kruis, CAP, KPC, Venex i algun boluntario spesífiko.
Djadumingu, 28 di yüni ku yudansa di Ofisina di Turismo (CTB) a logra pa Avior transportá e pasaheronan pa Venezuela. Un danki sigur na un i tur ku a duna sosten i yudansa pa e grupo di Venezolano por a keda hospedá di forma temporal na Kòrsou. Por informá tambe ku riba mesun fecha un tim di reskate di CUSAR (Curaçao Search and Rescue) a biaha pa Venezuela huntu ku militar di Merka. E partisipashon akí ta un inisiativa propio di CUSAR i ta tuma lugá bou di nan propio responsabilidat i ku nan propio rekursonan.
Aktualmente Kòrsou ta i lo sigui fasilitá entre otro ‘Defensie Caribisch Gebied’ i akshonan Merikano pa brinda asistensia di emergensia na nos bisiña Venezuela. Defensie ta brinda yudansa na nòmber di Reino Hulandes, pues tambe e islanan den Karibe. DRR ta hasiendo algun ehersisio interno pa por kordiná tur aktividatnan di yudansa, kedando den e kuadro di lei i hurídiko ku nos mester kumplí kuné lokal i internashonal. Apesar ku ta un situashon di krísis den eksterior, e asistensia humanitario ku ta ser brindá mester kana konforme lei pa evitá sanshonan internashonal ora ta trata di e.o. transporte di produkto i materialnan pa por brinda yudansa humanitario.
Krus Kòrá ‘Rode Kruis’ ta un ‘liason’ den e struktura lokal di organisashon pa Kontrol i Kombatí Desaster (CRBo), ku ta enkargá ku e kordinashon di un krísis òf kalamidat i alabes ta sòru pa mitigá e efektonan ku esaki por tin. Te ku awor Rode Kruis ta tuma donashon finansiero pa yudansa na Venezuela. Por hasi donashon via di kuenta banko di MCB di Rode Kruis na #2004, ku ta un number di kuenta spesial pa situashonnan di kalamidat internashonal. Donashonnan lo bai direktamente pa yudansa humanitario na Venezuela.
Por último, ta importante pa informá ku te awor ainda aeropuerto internashonal na Caracas, Maiquetía Simón Bolívar, ta será pa buelonan komersial. Si tin residentenan di Kòrsou òf otro personanan na Venezuela ku kier sali for di e pais, por hasi uso di aeropuertonan na Valencia – Arturo Michelena (VLN), Barcelona – José Antonio Anzoátegui (BLA) i Barquisimeto – Jacinto Lara (BRM).
