Próksimo seshon lo ta 27 di yüni
WILLEMSTAD – Den kuadro di duna informashon na komunidat i yega mas serka di esnan ku di forma ilegal ta permanesé riba nos pais, e tim di Rib’e Lugá, den estrecho kolaborashon ku Servisio di Atmishon (TO), a organisá un seshon di informashon na Parke Leyba. E aktividat aki ta forma parti di un seri di seshonnan di informashon ku Rib’e Lugá ta organisá na diferente bario i lokalidat na Kòrsou, ku meta di tene e komunidat bon informá tokante e trayekto di registrashon i legalisashon.
Durante e seshon, e personanan presente a risibí splikashon amplio tokante e propósito di Rib’e Lugá, e kondishonnan pa partisipá den e trayekto, e dokumentonan nesesario i e diferente stapnan ku mester ser sigui durante e proseso di registrashon. E reunion a ofresé tambe espasio pa interakshon direkto entre e representantenan di Rib’e Lugá i e komunidat, kaminda e asistentenan a por hasi pregunta i plantá nan situashon personal pa haña klaridat tokante nan posibilidatnan.
Pa garantisá ku tur persona por sigui e informashon di manera kla i komprendibel, durante e seshon a tene kuenta ku e diferente idioma ku e asistentenan ta papia. E aserkamentu multilingwe aki a kontribuí na un mihó komprenshon di e informashon i a permití ku mas persona por sinti nan inkluí den e proseso.
Un tema importante ku a keda resaltá durante e seshon tabata e importansia di no warda te ora ku tur dokumento ofisial ta kompletamente disponibel promé ku kuminsá ku e proseso di registrashon. E tim di Rib’e Lugá a stimulá e personanan ku ta bini na remarke pa registrá na tempu via e wèpsait ofisial, asta den kaso ku algun dokumento ainda ta den proseso di tramitashon. E úniko rekisito den e situashon aki ta ku e persona por demostrá ku e dokumentonan nesesario a wòrdu solisitá kaba. Di e manera aki, e proseso di registrashon no mester keda retrasá i e interesado por tuma e promé paso importante pa regla su situashon.
E gran interes i partisipashon durante e seshon na Parke Leyba ta mustra e nesesidat ku ta eksistí pa informashon kla, konfiabel i aksesibel tokante e trayekto. Pa e motibu ei, Rib’e Lugá lo sigui ku su kampaña di informashon den diferente bario na Kòrsou, ku meta di yega na mas hopi persona posibel i duna nan e orientashon nesesario pa por tuma desishonnan informá.
Kiko ta Rib’e Lugá?
Rib’e Lugá ta un trayekto temporal di registrashon i legalisashon destiná pa personanan indokumentá ku ta biba na Kòrsou. Via e trayekto aki, personanan ku ta kumpli ku e kondishonnan stipulá por registrá pa un pèrmit di estadia temporal. Entre otro, e interesado mester por demostrá ku nan tabata presente na Kòrsou promé ku 13 di novèmber 2025.
Keda informá
Rib’e Lugá lo sigui organisá seshonnan di informashon den diferente parti di Kòrsou. Pa keda na altura di siguiente aktividatnan i informashon aktualisá, sigui e kanalnan ofisial di Rib’e Lugá:
Facebook: Rib’e Lugá
Instagram: @ribe_luga
WhatsApp Channel: Rib’e Lugá – Nos Lugá, Bon Reglá
Pa registrashon i mas informashon tokante e trayekto, bishitá: www.ribeluga.cw.
