Publiká riba 24 Òktober 2017
Willemstad – Djaweps dia 26 di òktober 2017 lo tin un seshon di informashon tokante bòrchinan di propaganda den áreanan públiko. Esaki lo tuma lugá na Examenzaal ETE den APC Building na Schouwburgweg pa 10or di mainta. Ministerio di Tráfiko, Transporte i Planifikashon Urbano ta invitá tur doño di bòrchinan di propaganda pa asistí na e seshon importante aki.
Durante di e seshon lo duna splikashon amplio di e akshon di VVRP ku ta kuminsá pronto pa regulá bòrchinan di propaganda den áreanan públiko. E akshon aki ta konforme e ‘Landsverordening Openbare Orde (LOO) ku a drenta na vigor dia 1 di ougustus 2015. Tambe lo splika tokante e proseduranan vigente pa hasi petishon pa pone bòrchinan di propaganda di forma legal. Lo tei presente kolaboradónan di maneho di VVRP, ekspertonan di Servisio pa Planifikashon Urbano (ROP), ekspertonan di Servisio pa Obra Públiko (OW) i miembronan di Kuerpo Polisial. Lo tin oportunidat pa hasi pregunta.
Un apelashon na tur doño di bòrchinan di propaganda pa nan tei presente. Pa mas informashon por tuma kontakto ku VVRP via e number 465-1477, Whats app +5999511-8582 òf via di e-mail info.vvrp@gobiernu.cw.
