Notisia

WILLEMSTAD – Informashon di Gobièrnu ta masha importante na momentu ku tin un aktividat ku ta akapará hopi hende den nos komunidat. Ya pa vários aña servisionan di Gobièrnu ta bini huntu pa pone informashon aksesibel na nos pueblo. Den un evento grandi manera KARNAVAL, vários Ministerio ta trahando huntu ku servisio i organisashonnan no-gobernamental pa informá komunidat den e kuadro nan di KONSIENTISASHON, PREVENSHON I KOMPORTASHON.

Pa e motibunan ariba menshoná Gobièrnu ta ekstendé un invitashon na:
– Tur lidernan di grupo di Karnaval i/o organisashon tur ku ta den parada;
– Tur lider di agrupashon musikal.

Alabes ta invitá tur prensa pa ta presente na e mainta di informashon akí. Boso partisipashon ta di gran balor pa asina e informashon ku e diferente institutonan ke kompartí por yega na boso i pueblo di Kòrsou kompletu tambe por keda informá. Riba e mainta akí personanan por risibí informashon pero tambe por hasi diferente pregunta nan dirigí riba sierto tópiko.

Organisashonnan tur ku ta apartisipá na e aktividat aki ta:
Ministerio di Hustisia, Ministerio di Enseñansa, Siensia, Kultura i Deporte, Ministerio di Salubridat Públiko, Medio Ambiente i Naturalesa, Korps Politie Curacao, Brandwer, Fundashon Ambulans, AGKK i AMAK. Tur lo tei pa duna informashon relashoná ku aktividatnan rondó di Karnaval. Algun temanan ku ta elaborá riba djé ta: Seguridat i Òrden Públiko, Importansia di ’Dranghek’, Higiensa, Zonido, Pèrmit, Bienestar di Mucha i Norma i Balor.

E seshon informativo ta tuma lugá:
Dia: djasabra, 8 febrüari 2020
Ora: 10:00 pa 12:30
Lugá: Scholengemeenschap Otrabanda (Goslinga VSBO)
Adrès: Leeuwenhoekstraat s/n.

Boso presensia lo ta altamente apresiá.

—
Sra. L.Sambo-Velder
Direktor di Sektor di Kultura & Deporte
Ministerio di Enseñansa, Siensia, Kultura & Deporte

MAS NOTISIA

Ministerio konserní: Enseñansa, Siensia, Kultura & Deporte