Willemstad – Resientemente e Departamento di Edukashon, Formashon i Training (OVT) di Sentro di Detenshon i Korekshon Kòrsou a alkansá un otro logro importante. Shete kliente a risibí nan sertifikado despues di a kompletá ku éksito un kurso di tres luna di pegadó di tegel (Tegelzetter) bou di guia di señor Randy Emelina di e Fundashon di fundeshi te dak.
Ku e kurso akί prizòn ta sigui amplia den inovashon pa edukashon di formashon di fishi. E meta ta pa prepará klientenan ku abilidatnan práktiko ku lo oumentá nan oportunidatnan riba merkado laboral, pa ora nan regresá bèk den e komunidat.
Durante e kurso, e kursistanan a siña midi, korta i pone tegel, usa diferente hèrmèntnan di forma korekto, i dominá e teoria nesesario. Banda di e abilidatnan tékniko, tambe nan a desaroyá kapasidatnan importante manera traha huntu, disipliná, responsabilidat i kompromiso.
Ku e resultadonan aki, SDKK ta reafirmá ku edukashon i formashon profesional ta un di e instrumentonan mas fuerte pa duna klientenan perspektiva, stimulá desaroyo personal i prepará nan pa un regreso eksitoso den komunidat.
Finalmente SDKK ta konvensί ku kada abilidat nobo ku un kliente desaroyá, ta un invershon den su mes i pa un mihó futuro, pa asina e por tin un regreso eksitoso den komunidat.
