Publiká riba 02 Ougùstùs 2023
Willemstad- E Departamentu di Inspekshon Ekonómiko di Ministerio di Desaroyo Ekonómiko (MEO), diariamente ta ehekutá kontròlnan Ekonómiko i kontrolnan di ‘Ijkwezen’ na Kòrsou. E meta di e trabounan di e departamentu akí ta, pa frena inflashon i protehá tantu e provedor komo e konsumidó.
Bou di e tareanan di kontrol ekonómiko, e tim ta kontrolá establesimentunan riba entre otro, indikashon di preis riba produktonan, kumplimentu ku e ordenansa (lei) di establesimentu, preis di produkto i servisionan regulá pa Gobièrnu i kontrol riba orario di operashon. E sekshon di ‘Ijkwezen’ den e Departamentu di Inspekshon Ekonómiko ta ehekutá kontrolnan riba peso, midí i instrumèntnan ku ta midi i pisa pa uso komersial; por ehèmpel pòmpnan di gasolin i balansa den supermerkado, toko i botikanan. Kontrolnan di tantu inspekshon ekonómiko komo ‘Ijkwezen’ ta sosodé diariamente segun un skema di planiashon anual di e departamentu, pero tambe a base di posibel kehonan di komunidat ku e departamentu ta risibí.
Inspekshon Ekonómiko ta repartí Kòrsou den 5 diferente zona: Zona 1 ta e área entre Sta. Rosa i Oostpunt, Zona 2 ta entre Asiento i Steenrijk, Zona 3 ta entre Piskadera i Otrabanda, Zona 4 ta e área entre Rancho i Labadera i Zona 5 ta di Mahuma te ku Westpunt. Kada 3 luna e inspektornan ta keda asigná ku un otro zona pa ehekutá e kontrolnan nesesario.
For di Yanüari te ku Yüni 2023, e Tim di Inspekshon Ekonómiko ya a ehekutá un total di 1.367 kontrol ekonómiko i 1.101 Kontrol di Ijkwezen.
Aki un skema ku repartishon mensual di e kontrolnan di e promé seis lunanan di 2023 i un komparashon ku e mesun periodo akí na aña 2022:
