Notisia

Willemstad – Ministerio di Enseñansa, Siensia, Kultura & Deporte a sera e periodo di Idioma Materno ku ta kore di 8 pa 21 febrüari ku un debate kaminda e tópiko tabata: Responsabilidat di artistanan di tur generashon pa stimulá uso di- i engrandesé nos idioma Papiamentu den komposishon. Minister di Enseñansa, Siensia, Kultura & Deporte, sr. Sithree van Heydoorn, a hasi e apertura ofisial i representante di e organisashon APES, sr. Gilbert Bishop, a hiba palabra i mustra riba e importansia di nos idioma Papiamentu. Alabes, sra. Jeandor a hasi entrega huntu ku sr. Bishop di e resolushonnan tokante di nos idioma segun e perspektiva di nan organisashon APES.

Moderadó di e debate tabata sra. Nathania Engelhart di e kompania DEBATE. Panelistanan durante e debate tabata: Sra. Elia Isenia, Sr. Winny Poulo, Sr. Gilbert ” Gibi” Doran”, Sr. Gilbert ” Dibo” Doran, Sr. Randell Rosalia i Sra. Monica Mao-Cheia. E debate a keda transmití via di vários plataforma manera: Radio Hoyer, Radio Mas, Radio Z-86, Radio Margaretha, Radio Direct, Radio Krioyo i TCFM. Meta di e debate tabata pa mustra riba e variedat di argumentonan tantu pro i kontra riba e uso di Papiamentu den nos mes komposishonnan. A debatí riba ponensianan ku ta para ketu na apresio pa nos mes idioma den nos komposishonnan popular, a dialogá riba e uso korekto di Papiamentu, uso di palabranan di otro idioma i tambe riba e importansia di desaroyo di nos idioma spesial pa ku nos hubentut. 

Na final di e anochi, Minister di Enseñansa, Siensia, Kultura i Deporte, sr. Sithree van Heydoorn, a hasi entrega di rekonosementu na artistanan lokal ku a traha riba un ‘medley’ di vários kansion di sr. Rignald Recordino. Tambe, Minister a yama tur e panelistanan danki pa nan kontribushon balioso na aktividat i na nos idioma Papiamentu.

 ** Riba e potrètnan athunto por tuma nota di e debate i rekonosementu na nos mes artistanan ku ta sigui engrandesé nos idioma papiamentu den nan komposishonnan.

Pa mas potrèt por bishita: Relato Fotográfiko Debate Idioma Materno 2022