Den e siman akí skolnan ta dediká atenshon pa alumnonan siña tokante di tur aspekto di arte i ta stimulá alumnonan pa nan mes deskubrí nan talento di arte den skolnan. E sektor di Kultura i Deporte ku ta enkargá ku e proyekto aki, a hasi e petishon na tur skol pa stimulá kreatividat den skolnan i dediká e siman aki na arte. E motibu indiká den e dekreto ta:
• Arte ta fungi komo instrumento pa un edukashon mas kompletu i un desaroyo sano di nos muchanan;
• Arte ta nesesario i indispensabel den skolnan, komo ku esaki ta aportá entre otro na formashon i desaroyo kreativo di nos muchanan i ta un vehíkulo importante pa sostené edukashon serka nos muchanan.
Pa motivá alumnonan e aña akí Sektor di Kultura i Deporte ta kolaborá ku e inisiativa “Open Atelier Route” organisá pa artista visual Avantia Damberg ku ta un evento ku ta aksesibel pa tur hende por sera konosí ku artistanan lokal na un manera agradabel. Sektor di Kultura i Deporte ta hasi e evento aksesibel pa un grupo di mucha i hóben pa medio di kordiná e bishita di e grupo aki i tambe fasilitá skolnan den serkania di e ruta, transporte pa asina nan por bishitá galeria òf tayer di artistanan lokal. Durante di e dia aki tantu mucha i hóben ta bai bishitá artistanan lokal kaminda nan ta mira e trabou di e artista pero tambe ta haña e oportunidat pa tende un tiki mas tokante e artista i su arte.
Sektor di Kultura i Deporte ta kontentu di mira desaroyonan positivo pa loke ta trata arte den skol. Un ehèmpel di esaki ta e inisiativa di studiante artista visual David Paulus ku ta studia pa bira dosente di arte na Fontys School of Arts na Hulanda. Durante di e algun siman David a organisá i implementá diferente tayer rondó di e tema di abolishon di sklabitut i arte den skolnan. Alumnonan di entre otro Kolegio Pierre Lauffer VSBO i Maria Immaculata Lyceum a forma parti di e tayer aki, kaminda arte ta keda kreá usando materialnan desechabel. Esaki ta demonstrá ku no tin mester di hopi pa alumnonan por aktivá nan kreatividat.
Sektor di Kultura i Deporte na nòmber di Gobièrnu di Kòrsou ta yama un danki na kada skol ku a i ta partisipa den e proyekto aki di Siman di Arte den Skol.
**Riba potrètnan por haña un bista di edukashon di arte relashoná ku siman di Arte den Skol. Pa mas potrèt por bishitá nan: Galeria di potrèt Siman di Arte 2024
