Notisia

WILLEMSTAD – EU Desk Curaçao ta invitá organisashonnan lokal, empresarionan i inovadónan pa partisipá na e Siman di Informashon anual, ku e aña akí ta dediká na posibilidatnan di finansiamentu di EU pa proyektonan den e área di energia renobabel. Di 3 pa 6 di desèmber 2024, e evento akí lo ta un plataforma inspirativo pa siña i kolaborá pa prepará pa un futuro sostenibel pa Kòrsou.

Stimulá kambio pa medio di konosementu
E siman di informashon akí ta un yamada na organisashonnan ku ta kla pa tuma akshon i probechá di e oportunidatnan di energia renobabel. Partisipantenan lo risibí informashon ekstenso tokante e programanan di finansiamentu di EU ku ta disponibel, e proseso di aplikashon i e mihó manera pa desaroyá proposishonnan eksitoso.

Dikon partisipá?

• Amplia konosementu: Deskubrí posibilidatnan di finansiamentu dirigí spesialmente riba proyektonan di energia renobabel, inkluso kriterionan di atmishon i konsehonan pa aplikashon eksitoso.
• Historianan di éksito: Siña di ehèmpel di proyektonan eksitoso i esnan no tan eksitoso pa komprondé kiko ta funshoná i kiko no.
• Oportunidat pa nètwèrk: Krea konekshon ku ekspertonan, stakeholder nan lokal i posibel partnernan di Oropa i region di Karibe.
• Kolaborashon: Deskubrí kon aliansanan entre sosionan por yuda kontribuí na e éksito di proyektonan i mesora kontribuí na e metanan di desaroyo sostenibel di Kòrsou.

Detayenan di evento

• Fecha: 3–6 di desèmber 2024
• Orario: 10:00 – 16:00
• Lokalidat: Studio Kontentu (Sambil) i virtual

Danki na e formato híbrido, e evento ta aksesibel pa partisipantenan tantu físikamente komo virtual, hasiendo fásil pa un i tur por partisipá den e diskushonnan tokante finansiamentu pa energia renobabel.

Dikon e siman di informashon akí ta importante?
Kòrsou ta na un momento krusial den su esfuersonan pa logra un solushon di energia sostenibel, i transformá su mes den un modelo pa energia renobabel den region di Karibe. EU Desk Curaçao ta dediká na duna sosten na organisashonnan lokal dor di minimalisá e distansia entre e posibilidatnan di finansiamentu di EU i proyektonan inovativo di energia renobabel. E evento akí ta un paso importante pa un futuro bèrdè i sostenibel pa nos isla, i ta fortalesé e relashonnan ku Union Oropeo.

Kiko mester hasi pa partisipá?
Registrashon ta habrí via eudeskcuracao@gobiernu.cw. Pa mas informashon òf asistensia, por tuma kontakto ku EU Desk Curaçao na 462-1444.

Huntu nos ta traha pa un Kòrsou sostenibel, ku energia renobabel. Bin forma parti di e Siman di Informashon transformativo akí i hasi bo vishon di proyekto un realidat. 

Informashon di Kontakto:
EU Desk Kòrsou
Website: www.meo.cw
Tel.: 462-1444
Email: eudeskcuracao@gobiernu.cw

Programa & Links EU Funds Week

MAS NOTISIA

Ministerio konserní: Desaroyo Ekonómiko