Siman di informashon tokante fondonan Oropeo pa organisashonnan na Kòrsou - Informashon tokante Gobièrnu di Kòrsou Bo opinion

Notisia

Siman di informashon tokante fondonan Oropeo pa organisashonnan na Kòrsou

Geplaatst op 15 October 2020 dor di Ministerio Desaroyo Ekonómiko

WILLEMSTAD – E organisashon European Union (EU) Desk Kòrsou ta tene seshonnan di informashon virtual durante un siman largu tokante aksesibilidat di Fondonan Oropeo pa organisashonnan na Kòrsou. E seshonnan ta tuma lugá entre 19 pa 23 di òktober 2020.

EU Desk Kòrsou ta un departamentu den e Sektor di Koperashon Ekonómiko Internashonal di Ministerio di Desaroyo Ekonómiko (MEO). EU Desk Kòrsou ta fungi komo e sentro nashonal di kontakto (NCP) pa programa,- i fondonan di supsidio Oropeo (ku eksepshon di e fondonan Oropeo di desaroyo, esta e European Development Fund (EDF).

EU Desk Kòrsou ta identifiká posibel fondonan ku Kòrsou por bin na remarke pé i ta informá i stimulá akseso na e programa- i fondonan aki. Na 2019 EU Desk Kòrsou huntu ku diferente partner, a tene seshonnan di informashon i di entrenamentu tokante programanan i fondonan di supsidio Oropeo. Komo ku tin hopi organisashon na Kòrsou ku ainda no ta hopi konosí ku e posibilidatnan ku e programanan Oropeo ta brinda, i hopi bia no sa kon pa haña akseso na e fondonan aki pa nan proyektonan, EU Desk Kòrsou ta bolbe tene un seri di seshon di informashon.

Esaki ta tuma lugá den e siman di 19 pa 23 di òktober durante un siman dediká na Fondonan Oropeo. E siman di informashon ta konsistí di diferente ‘webinar’ i tur persona interesá por partisipá. Partisipashon ta grátis, pero registrashon si ta obligatorio. Pa mas informashon i inskripshon por bishitá e Facebook page di EU Desk Kòrsou (@eudeskcuracao).

EU Desk Kòrsou ta organisá e siman di informashon aki den koperashon ku Ministerionan di Edukashon, Siensia, Kultura i Deporte (ESKD) i Ministerio di Desaroyo Sosial, Labor i Bienestar (SOAW). Tambe, EU Desk Kòrsou a risibí koperashon di diferente agensia Hulandes i organisashonnan Oropeo ku ta atendé ku e fondonan aki. Nan tambe lo duna splikashon tokante e diferente posibilidatnan ku tin.Organisashonnan na Kòrsou ku tin proyektonan kultural, kreativo i di media por entregá aplikashon pa risibí supsidio di Komishon Oropeo bou di e programa Creative Europe. Meskos ta konta pa e programa Erasmus+ ku ta mas dirigí riba enseñansa. EU Desk Kòrsou pues ta enkurashá tur organisashon ku ta aktivo den áreanan kultural, edukativo, empresarial (Orange Economy), i empresarionan interesá den otro temanan, pa partisipá na e seshonnan di informashon.

E fondonan Oropeo ta ofresé hopi oportunidat pa organisashonnan lokal risibí supsidio. Ta asina sí ku e proseso di aplikashon hopi bia por ta kompliká i petishonnan ta keda rechasá pa falta di konosementu. Pa e motibu aki, durante e siman di informashon, organisashonnan ku tin un petishon ku den pasado a keda rechasá, lo tin e oportunidat pa papia tokante esaki i haña mas informashon di e oradónan tokante puntonan di atenshon ku nan mester tene kuenta kuné ora ta hasi aplikashon pa supsidio.

Despues di e siman di informashon, EU Desk Kòrsou lo organisá entrenamentu pa esnan interesá por siña mas tokante kon ta hasi e aplikashon pa asina probecha mihó di e oportunidatnan ku Union Oropeo ta brinda.

Organisashonnan ku lo partisipá ta entre otro:

  • Creative Europe: E sekshon di Hulanda (Dutch Culture) ku ta e punto sentral di servisio i informashon na Hulanda pa e programa Creative Europe. E programa aki ta konsistí di dos parti: 1) pa sektor kultural, i 2) pa sektor di media / oudiovisual.
  • Agensia Nashonal di Hulanda pa e programa Erasmus+: Esaki ta e sentral di informashon i servisio na Hulanda pa e programa aki ku ta dirigí riba edukashon i entrenamentu pa tur sektor di enseñansa inkluso edukashon pa personanan adulto.
  • Agensia nashonal di Erasmus+ pa hóben: E agensia aki tambe ta duna presentashon, i ta dirigí riba hóben i proyektonan pa hóben. Supsidionan di e programa aki tin komo meta pa duna hóbennan e oportunidat pa desaroyá nan talentonan i asina yuda nan tuma kontrol di nan bida.
  • OCTA: OCTA ta e asosiashon di e islanan LGO, esnan ku tin vínkulo konstitushonal ku miembronan di Union Oropeo manera Hulanda, Fransia i Dinamarka. Te ku resientemente Inglatera tambe tabata parti di Union Oropeo, pero for di e aña aki esaki ya no ta e kaso mas. OCTA lo papia tokante tur e programanan ku lo ta disponibel pa LGO nan (pues Kòrsou tambe) entrante 2021 te ku 2027.
  • DEVCO: DEVCO ta e unidat den Union Oropeo ku ta atendé ku programanan di Koperashon pa desaroyo i di e departamentu ku ta atendé ku LGO. Nan lo papia tokante e asina yamá European Green Deal.

 

Ministerio konserní